ایران کا امریکی ڈرون مار گرانے کا دعویٰ، آئی آر جی سی کی جوابی کارروائی کی دھمکی

تہران (ڈیلی اردو) ایرانی پاسدارانِ انقلاب کے شعبہ تعلقاتِ عامہ نے خبردار کیا ہے کہ امریکی فوج کی جانب سے جنگ بندی کی کسی بھی خلاف ورزی کے خلاف جوابی کارروائی ان کا “جائز اور یقینی حق” ہے۔

یہ بیان ایسے وقت میں سامنے آیا ہے جب امریکی سینٹرل کمان (سینٹکام) نے اعلان کیا کہ اس نے گزشتہ رات جنوبی ایران میں دفاعی نوعیت کے حملے کیے۔

پاسدارانِ انقلاب نے اپنے بیان میں امریکی حملوں کا براہِ راست ذکر کیے بغیر دعویٰ کیا کہ امریکی فوج نے “خطے میں اپنی مداخلت پسندانہ مہم جوئی اور جارحانہ رویہ جاری رکھتے ہوئے ایرانی فضائی حدود کی خلاف ورزی کی”، جس کے بعد ایرانی دفاعی یونٹس نے “محتاط انٹیلی جنس نگرانی کے بعد ایک MQ-9 ڈرون کو نشانہ بنا کر مار گرایا۔”

بیان میں مزید کہا گیا کہ ایرانی فورسز نے ایک RQ-4 ڈرون اور ایک F-35 لڑاکا طیارے پر بھی فائرنگ کی، جس کے نتیجے میں وہ پسپا ہو کر علاقائی پانیوں سے باہر نکلنے پر مجبور ہوئے۔ تاہم پاسدارانِ انقلاب نے ان واقعات کے وقت اور مقام کی تفصیلات فراہم نہیں کیں۔

اس سے قبل امریکی فوج نے کہا تھا کہ جنوبی ایران میں کیے گئے حملوں میں ایرانی میزائل سائٹس اور ان کشتیوں کو نشانہ بنایا گیا جو مبینہ طور پر بارودی سرنگیں بچھانے کی کوشش کر رہی تھیں۔

امریکی سینٹرل کمان کے مطابق یہ حملے “اپنے دفاع” میں کیے گئے اور ان کا مقصد ایرانی خطرات سے امریکی افواج کا تحفظ تھا۔

دوسری جانب ایرانی ذرائع ابلاغ نے بندر عباس اور اس کے ہوائی اڈے کے اطراف دھماکوں کی آوازیں سنائی دینے کی اطلاع دی ہے۔

ادھر ایران اور امریکا کے درمیان ممکنہ مذاکرات کی امیدوں کے باوجود کشیدگی میں اضافے کے باعث عالمی منڈی میں تیل کی قیمتوں میں دوبارہ اضافہ دیکھا جا رہا ہے، تاہم امریکی وزیر خارجہ مارکو روبیو نے کہا ہے کہ دونوں ممالک کے درمیان معاہدہ اب بھی ممکن ہے۔