جنوبی وزیرستان: داعش کے حملے میں مولانا حافظ سلطان محمد حقانی ہلاک

وانا (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان میں مولانا حافظ سلطان محمد حقانی ایک نصب شدہ بم (آئی ای ڈی) کے دہشت گرد حملے میں شدید زخمی ہونے کے بعد زخموں کی تاب نہ لاتے ہوئے ہلاک ہو گئے۔

حملہ گزشتہ روز اس وقت ہوا جب مولانا حافظ سلطان محمد حقانی مدرسے سے اپنے گھر کی جانب جا رہے تھے۔ دھماکے کے نتیجے میں وہ شدید زخمی ہوئے، جنہیں فوری طور پر ڈسٹرکٹ ہیڈکوارٹر اسپتال وانا منتقل کیا گیا۔ تشویشناک حالت کے پیش نظر انہیں ڈی آئی خان ریفر کیا گیا، جہاں وہ دورانِ علاج زخموں کی تاب نہ لاتے ہوئے دم توڑ گئے۔

جمعیت علمائے اسلام (جے یو آئی) کے سربراہ مولانا فضل الرحمان نے واقعے کی شدید الفاظ میں مذمت کرتے ہوئے مطالبہ کیا کہ واقعے کی فوری اور شفاف تحقیقات کرائی جائیں اور ملوث عناصر کو گرفتار کر کے قانون کے مطابق سخت سزا دی جائے۔

مولانا حافظ سلطان محمد حقانی جے یو آئی لوئر وزیرستان کے سینئر رہنما، وفاق المدارس العربیہ لوئر وزیرستان کے ذمہ دار اور جامعہ دارالعلوم اشرفیہ کے مہتمم تھے۔

دوسری جانب عالمی شدت پسند تنظیم داعش نے حملے کی ذمہ داری قبول کر لی ہے۔