خانیوال: کیری وین سدھنائی میلسی لنک کینال میں گرگئی، ایک ہی خاندان کے 10 افراد ہلاک

خانیوال (ڈیلی اردو) شیخوپورہ سے میاں چنوں آنے والی مسافر وین میلسی لنک کینال میں جارگری،  حادثے میں 10 افراد ہلاک ہوگئے جب کہ 2 لاپتہ مسافروں کی تلاش جاری ہے۔

تفصیلات کے مطابق میاں چنوں کی میلسی لنک کینال سے 32 گھنٹوں کے طویل آپریشن کے بعد 9 لاشیں نکالی جاسکی ہیں جبکہ دو لاشوں کی تلاش ابھی بھی جاری ہے۔

ریسکیو ذرائع کا کہنا ہے کہ خانیوال کےقریب سدھنائی میں میلسی لنک کینال میں گرنے والی مسافروں سے بھری وین میں 12 افراد سوار تھے جن میں سے 10 افراد کی لاشیں نکال لی گئیں جبکہ ڈوپنے والے 2 افراد کی تلاش جاری ہے۔

خانیوال، میاں چنوں اور چوک اعظم کے ایک ہی خاندان کے گیارہ افراد وین پر سوار ہو کر فوتگی پر شیخو پورہ گئے تھے جہاں سے بدقسمت خاندان موٹروے کے ذریعے واپس میاں چنوں آ رہا تھا کہ عبدالحکیم انٹر چینج سے اترنے کے بعد گھر والوں سے موبائل فون کا رابطہ ختم ہوگیا، کیری وین میں سوار افراد کی موبائل کال کی آخری لوکیشن تلمبہ کے نزدیک آئی جس کے بعدتمام افراد کے موبائل فون بند ہو گئے۔

کیری وین نہر کنارے ایک موٹر سائیکل سوار کو بچاتے ہوئے میلسی لنک کنال تلمبہ کے قریب پل باہمن پر نہر میں جا گری، گاڑی کے نہر میں گرنے کے 22 گھنٹے بعد نہر کے کنارے بچے کے فیڈر اور گاڑی کے ٹوٹے ہوئے شیشے ملنے کے بعد پولیس اور انتظامیہ حرکت میں آئی۔ ڈی سی نے میلسی لنک کنال کو بند کروایا، ریسکیو ٹیموں نے دوسرے روز موقع پر پہنچ کر نہر میں تلاش شروع کی۔ کیری وین میں 4 خواتین اور 3 بچوں سمیت 11 افراد سوار تھے۔ میاں چنوں فضل کالونی کے عمران کی اہلیہ 2 بچیاں اور سسرالی خاندان تھا۔

دوسرے دن بھی ریسکیو ٹیموں نے سرچ آپریشن شروع کیا اور نہر سے 9 لاشیں اور کیری وین نکالی جاچکی ہے تاہم باقی دو لاشوں کی بازیابی کے لئے ابھی بھی آپریشن جاری ہے۔ جائے وقوعہ پر لوگوں کی بڑی تعداد موجود تھی، ریسکیو نے لاشوں کو ان کے لواحقین کے حوالے کر دیا۔