سبی: ‏ہرنائی میں ایف سی کی گاڑی کے قریب دھماکا، ایک اہلکار شہید، 5 زخمی

سبی (سید طاہر علی) صوبہ بلوچستان کے ضلع سبی کی تحصیل ہرنائی میں سیکیورٹی فورسز کی گاڑی کے قریب زور دار دھماکہ ہوا جس میں ایک اہلکار شہید جبکہ پانچ اہلکار زخمی ہوگئے۔

تفصیلات کے مطابق بلوچستان کے ضلع سبی کی تحصیل ہرنائی کے علاقے شاہرگ میں ایف سی کی گاڑی کے قریب بارودی سرنگ کا دھماکا ہوا جس کے نتیجے میں گاڑی میں سوار ایک ایف سی اہلکار شہید اور 5 اہلکار زخمی ہوگئے۔

ذرائع کے مطابق دھماکے میں سیکیورٹی فورسز کی گاڑی کو بھی شدید نقصان پہنچا۔

واقعے کے بعد پولیس، لیویز اور ریسکیو ٹیمیں جائے وقوع پر پہنچ گئیں اور زخمی ہونے والے اہلکاروں کو لیبر ہسپتال شاہرگ منتقل کیا، جہاں طبی امداد کی فراہمی کے بعد زخمیوں کو سی ایم ایچ کوئٹہ منتقل کردیا گیا ہے۔

جبکہ سکیورٹی فورسز نے علاقے کی ناکہ بندی کر کے سرچ آپریشن شروع کردیا ہے۔

دوسری جانب کالعدم تنظیم بلوچ لبریشن آرمی نے دھماکے کی ذمہ داری قبول کرلی ہے۔