سیالکوٹ: موٹر سائیکل سواروں کی کار پر فائرنگ، وکیل جاں بحق، 2 زخمی

سیالکوٹ (ڈیلی اردو) صوبہ پنجاب کے ضلع سیالکوٹ میں نامعلوم افراد نے گاڑی پر فائرنگ کر کے اس میں سوار مقامی وکیل کو قتل کردیا۔

تفصیلات کے مطابق سیالکوٹ کے تھانہ کوتوالی کے علاقہ پیرس روڈ پر نامعلوم موٹر سائیکل سواروں کی فائرنگ سے سیالکوٹ ڈسٹرکٹ بار کے وکیل سجاد حسین ڈھدا ایڈوکیٹ جاں بحق ہوگئے۔

ممبر بار سیالکوٹ اپنے گھر سے کچہری آفس کی طرف آرہے تھے، چیمبر آف کامرس کے قریب پہنچے تو نا معلوم موٹر سائیکل سوار ملزمان نے اندھا دھند فائرنگ کر دی، فائرنگ کی زد میں آکر سینئر وکیل موقع پر ہی جاں بحق جبکہ دو افراد زخمی ہوگئے۔

واقع کی اطلاع ملتے ہی وکلا کی بڑی تعداد اور ڈی پی او سیالکوٹ پولیس کی بھاری نفری کے ہمراہ جائے وقوعہ پر پہنچ گئے، پولیس نے جائے وقوعہ سے شواہد اکھٹے کرنا شروع کر دیئے ہیں۔

ڈی پی او سیالکوٹ کا کہنا ہے سی سی ٹی وی کیمروں کی مدد سے ملزمان کی شناخت کی جا رہی ہے، دوسری جانب ڈسٹرکٹ بار نے دو دن مکمل ہرٹال کی کال دے دی۔