شمالی وزیرستان میں سیکورٹی فورسز کی گاڑی کے قریب دھماکا، ایک اہلکار ہلاک، 3 زخمی

اسلام آباد (ش ح ط) صوبہ خیبر پختونخوا کے قبائلی ضلع شمالی وزیرستان کی تحصیل میر علی کے گاؤں عیدک میں پاک فوج کی گاڑی پر فائرنگ اور بم حملہ کیا گیا جس کے نتیجے میں ایک اہلکار ہلاک اور تین زخمی ہوگئے۔

سرکاری ذرائع کے مطابق میرعلی میں عیدک کے مقام پر سکیورٹی فورسز کے بم ڈسپوزل سکواڈ اور گشتی پارٹی پر ریموٹ کنٹرول بم حملہ کیا گیا، جس کے نتیجے میں ایک اہلکار سپاہی امیر ہلاک جبکہ سپاہی ابومنان، حوالدار ارشد، سپاہی اسلم نبی زخمی ہوگئے۔ زخمیوں کو طبی امداد کیلئے ہسپتال منتقل کر دیا گیا ہے۔

مقامی ذرائع کا کہنا ہے کہ سیکورٹی فورسز کی فائرنگ کی زد میں آکر ایک شہری سعد اللہ بھی ہلاک جبکہ کم از کم چھ شہری زخمی ہوگئے۔

اب اس علاقے کو سیل کردیا گیا ہے اور کرفیو نافذ کردیا گیا ہے۔ اس علاقے کو غیر آباد کرنے کے لئے دھاتوں اور معدنیات سے مالا مال شمالی وزیرستان میں اس طرح کا قتل روز کا معمول ہے۔ https://t.co/VZuduQA9pi

— Ali Wazir Fan's (@AliWazirFans) May 18, 2020

دوسری جانب اس حملے کی ذمہ داری کالعدم تنظیم حزب الاحرار نے قبول کی ہے۔

وقوعہ کے بعد سیکیورٹی فورسز نے علاقے کو گھیرے میں لے کر سرچ آپریشن شروع کردیا، جبکہ علاقے میں کرفیو نافذ کر دیا گیا ہے۔