لاہور میں موٹر سائیکل سوار پر تشدد کرنے والا ملزم عقیل مرزا گرفتار

لاہور (ڈیلی اردو) کیولری میں موٹر سائیکل سوار شخص پر تشدد کرنے والے مسلح شخص کو ویڈیو سوشل میڈیا پر وائرل ہونے کے بعد گرفتار کرلیا گیا۔

لاہور کے علاقے کیولری میں شہری پر مسلح شخص کے تشدد کی موبائل فوٹیج سوشل میڈیا پر وائرل ہونے کے بعد سی سی پی او لاہور نے ازخود نوٹس لیتے ہوئے تشدد کرنے والے شخص کو گرفتار کرنے کے احکامات جاری کیے تھے جس کے بعد مسلح شخص کو گرفتار کرلیا گیا۔ ذرائع کا کہنا ہے کہ ملزم کی شناخت عقیل مرزا کے نام سے ہوئی ہے۔ ملزم ایک نجی بینک میں منیجر ہے۔

شہری پر مسلح شخص کے سرعام تشدد کی سوشل میڈیا پر ویڈیو کا معاملہ، سی سی پی او لاہور ذوالفقار حمید کا نوٹس، ملزم کے سراغ کے لئے ٹیمیں تشکیل، ملزم کے نام، گھر اور فون نمبر کا پتہ چل گیا، سیف سٹی کیمروں سے لوکیشن کا سراغ لگایا جا رہا ہے۔ ترجمان لاہور پولیس pic.twitter.com/wxVMOTykyv

— Capital City Police Lahore (@ccpolahore) December 15, 2019

تفصیلات کے مطابق مبینہ طور پر کیولری کے علاقے میں مین روڈ پر ایک موٹرسائیکل سوار کی بائیک جیپ سے ٹکرائی، جیپ سے پینٹ اور جیکٹ میں ملبوس شخص نے نیچے اتر کر پہلے موٹرسائیکل سوار کو برا بھلا کہا اور اچانک طیش میں آکر اس کو تشدد کا نشانہ بنانا شروع کردیا۔

جیپ سوار موٹرسائیکل سوار کو گھسیٹتا ہوا اپنی جیپ کے پاس لے گیا اور جیپ میں سے اسلحہ نکال کر تان لیا، موٹر سائیکل سوار اس شخص سے معافی مانگتا رہا لیکن جیپ سوار نے تشدد جاری رکھا، اس تمام تر واقعہ کو جیپ کی پچھلی جانب موجود کار میں سوار شخص نے موبائل کیمرے کی مدد سے محفوظ کرکے سوشل میڈیا پر وائرل کردیا۔

سوشل میڈیا پر خبر آنے کے بعد سی سی پی او لاہور ذوالفقار حمید نے واقعہ کا ازخود نوٹس لیا اور ایس پی کینٹ کو مسلح جیپ سوار کی گرفتاری کے متعلق ہدایات جاری کیں۔ سوشل میڈیا کے مطابق یہ واقعہ کیولری گراؤنڈ میں پیش آیا تھا اس لیے وہاں پر موجود سی سی ٹی وی کیمروں اور ایکسائز کے ریکارڈ سے جیپ کا ڈیٹا حاصل کیا گیا۔

یہ ہیں وہ حضرت جس پر الزام ہے کہ اس نے ایک موٹرسائیکل سوار کو پستول دکھا کر تشدد کا نشانہ بنایا. سی سی پی او لاہور ذوالفقار حمید کے حکم پر گرفتار کر لیا گیا pic.twitter.com/po7iivAhRt

— Capital City Police Lahore (@ccpolahore) December 15, 2019

سی سی پی لاہور ذوالفقار حمید کا کہنا ہے کہ سیف سٹی کیمروں کے ریکارڈ کے مطابق موٹرسائیکل سوار نے جیپ کو پیچھے سے ٹکر ماری۔