لبنان سمیت ہر محاذ پر آزادانہ کارروائی کا حق برقرار رہیگا، اسرائیلی وزیراعظم

یروشلم (ڈیلی اردو/ بی بی سی) اسرائیلی وزیرِ اعظم بنیامن نیتن یاہو نے کہا ہے کہ اُنہوں نے گزشتہ رات امریکی صدر ڈونلڈ ٹرمپ سے ایران کے ساتھ جاری جوہری مذاکرات کی تازہ صورتحال پر بات چیت کی۔

ایکس پر جاری بیان میں نیتن یاہو نے کہا کہ دونوں رہنماؤں نے اس بات پر اتفاق کیا کہ ایران کے ساتھ کسی بھی حتمی معاہدے میں جوہری خطرے کا مکمل خاتمہ ضروری ہے۔ ان کے مطابق معاہدے میں ایران کے افزودہ جوہری مواد کا خاتمہ اور یورینیم افزودگی کی تنصیبات کا بند ہونا بھی شامل ہونا چاہیے۔

نیتن یاہو نے کہا کہ اُن کی پالیسی بھی وہی ہے جو صدر ٹرمپ کی ہے، اور ایران کو کسی صورت جوہری ہتھیار حاصل کرنے کی اجازت نہیں دی جائے گی۔

دوسری جانب ایک سینئر اسرائیلی عہدیدار نے برطانوی خبر رساں ادارے بی بی سی کو بتایا کہ نیتن یاہو نے صدر ٹرمپ کو واضح کیا ہے کہ اسرائیل لبنان سمیت ہر محاذ پر اپنے سکیورٹی خطرات کے خلاف آزادانہ کارروائی کا حق برقرار رکھے گا۔

عہدیدار کے مطابق امریکہ ایران کے ساتھ جاری مذاکرات سے متعلق اسرائیل کو مسلسل آگاہ کر رہا ہے، جن کا مقصد آبنائے ہرمز کھولنا اور متنازع نکات پر حتمی معاہدے تک پہنچنا بتایا جا رہا ہے۔

اسرائیلی عہدیدار نے مزید کہا کہ صدر ٹرمپ اپنے اس مؤقف پر قائم ہیں کہ ایران کے جوہری پروگرام کا مکمل خاتمہ اور افزودہ یورینیم کا انخلا کسی بھی معاہدے کی بنیادی شرط ہے۔

واضح رہے کہ اس سے قبل بھی نیتن یاہو یہ کہہ چکے ہیں کہ جب تک ایران کا جوہری خطرہ مکمل طور پر ختم نہیں ہوتا، کسی حتمی معاہدے کا امکان نہیں۔