لکی مروت میں ایک گھنٹے کے دوران دہشت گردوں کی فائرنگ سے دو اہلکار ہلاک

اسلام آباد (ش ح ط) صوبہ خیبر پختونخوا کے ضلع لکی مروت میں ایک گھنٹے کے دوران فائرنگ کے دو واقعات میں سی ٹی ڈی اور لیویز فورس کے دو اہلکار ہلاک ہوگئے ہیں۔

پولیس کے مطابق لکی مروت کے علاقے گنڈی جانخیل کے قریب دہشت گردوں کی فائرنگ سے کاؤنٹر ٹیررازم ڈیپارٹمنٹ (سی ٹی ڈی) کا اہلکار وحید خان ہلاک ہوگئے۔

دوسری جانب ایک اور اہلکار کی ہلاکت کا واقعہ لکی مروت میں پیش آیا۔

پولیس کے مطابق جمعرات کی شب تاجہ زئی اڈا پر نامعلوم دہشت گردوں نے فائرنگ کر کے ایک لیویز فورس کے اہلکار شریف اللہ کو ہلاک کر دیا۔

تاحال کسی بھی گروہ نے ان حملوں کی ذمہ داری قبول نہیں کی ہے۔

پولیس کے مطابق جائے وقوع سے شواہد جمع کر کے تحقیقات شروع کر دی گئی ہیں۔

ادھر قبائلی ضلع شمالی وزیرستان کے علاقے حسو خیل میں سیکیورٹی فورسز کی گاڑی پر دہشت گردوں کے حملے میں ایک اہلکار ہلاک ہوگیا ہے۔