ٹرمپ کا خلیجی ممالک سے فوری ابراہیمی معاہدے میں شمولیت کا مطالبہ، عمان کو سخت وارننگ

واشنگٹن (ڈیلی اردو) امریکی صدر ڈونلڈ ٹرمپ نے خلیجی ممالک پر دباؤ بڑھاتے ہوئے کہا ہے کہ وہ چاہتے ہیں کہ سعودی عرب، متحدہ عرب امارات، قطر اور دیگر ممالک فوری طور پر معاہدہ ابراہیمی میں شامل ہوں۔

امریکی کابینہ کے اجلاس میں گفتگو کرتے ہوئے ٹرمپ نے کہا کہ ان ممالک کو امریکہ کے ساتھ تعاون کرنا چاہیے اور ’’وہ ہمارے مقروض ہیں۔‘‘

اس دوران ٹرمپ نے مشرق وسطیٰ کے لیے امریکی ایلچی سٹیو وٹکوف سے پوچھا کہ کیا وہ ان ممالک کو معاہدے پر دستخط کے لیے آمادہ کر سکتے ہیں، جس پر جواب دیا گیا کہ اس مقصد کے لیے دباؤ ڈالا جا رہا ہے۔

امریکی صدر نے کہا کہ اگر متعلقہ ممالک معاہدہ ابراہیمی میں شامل نہیں ہوتے تو وہ اس بات کے بارے میں پُریقین نہیں کہ پھر کسی بڑے معاہدے کی ضرورت بھی ہے یا نہیں۔

ایران کے ساتھ ممکنہ معاہدے کے بارے میں سوال پر ٹرمپ نے واضح جواب دینے سے گریز کیا، تاہم کہا کہ امریکہ ایک اچھا معاہدہ کر سکتا ہے، لیکن اگر وہ ’’بہترین‘‘ نہ ہوا تو واشنگٹن اسے قبول نہیں کرے گا۔

آبنائے ہرمز سے متعلق سوال پر ٹرمپ نے کہا کہ یہ آبی گزرگاہ سب کے لیے کھلی رہے گی، امریکہ اس کی نگرانی کرے گا لیکن کوئی ایک فریق اس پر کنٹرول نہیں کرے گا۔

انہوں نے مزید کہا کہ عمان سمیت خطے کے ممالک کو بھی اسی طرز عمل پر چلنا ہوگا، ورنہ امریکہ کے پاس دیگر آپشنز بھی موجود ہیں۔