ڈی آئی خان: نفرت انگیز تقریر پر کالعدم تنظیم کے سربراہ مولانا احمد لدھیانوی کیخلاف مقدمہ درج

ڈیرہ اسماعیل خان (بیورو چیف) خیبر پختونخوا حکومت کی جانب سے پابندی کے باوجود کالعدم تنظیم جماعت اہل سنت کے سربراہ مولانا احمد لدھیانوی کی جانب سے ڈیرہ اسماعیل خان کے نواحی علاقے ہمت میں جلسہ میں شرکت اور تقریر کرنے پر تھانہ صدر میں مقدمہ درج کرلیا گیا۔

تفصیلات کے مطابق تھانہ صدر کے ایس ایچ او عابد اقبال نے زیر دفعہ 3 لائوڈ سپیکر ایکٹ 153-188/اور 16 ایم پی او کے تحت مقدمہ درج کرلیا ہے۔

کالعدم تنظیم جماعت اہل سنت کے سربراہ مولانا احمد لدھیانوی جن پر حکومت کی جانب سے ڈیرہ اسماعیل خان آمد اور تقریر پر پابندی ہے نے گائوں ہمت میں منعقدہ ”چاند ستارے کانفرنس” میں شرکت اور نفرت انگیر تقریر کی۔

پولیس کے مطابق مذکورہ جلسہ ضلعی انتظامیہ کی منظوری کے بغیر کیا گیا اور پابندی کے باوجود سائونڈ سسٹم کا استعمال بھی کیا گیا۔ صدر پولیس نے سربراہ کالعدم تنظیم جماعت اہل سنت مولانا احمد لدھیانوی سمیت جلسہ کے منتظمین حاجی اسلام الدین، مولانا عثمان چوہدری، حافظ بلال اعوان اور عمران منظور نامی افراد کیخلاف مقدمہ درج کرلیا ہے۔