ڈیرہ اسماعیل خان اور شمالی وزیرستان میں سیکیورٹی فورسز کا آپریشن، 6 دہشت گرد ہلاک

راولپنڈی (بیورو رپورٹ) صوبہ خیبر پختونخوا کے ضلع ڈیرہ اسماعیل خان اور قبائلی ضلع شمالی وزیرستان میں انٹیلی جنس بنیادوں پر کیے گئے 2 آپریشن کے دوران 6 دہشت گردوں کو ہلاک کردیا گیا۔

پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے دہشت گردوں کی موجودگی کی خفیہ اطلاع پر ڈیرہ اسماعیل خان میں 5 دہشت گردوں کو ہلاک کیا۔

ترجمان پاکستانی فوج نے کہا کہ شمالی وزیرستان میں بھی ایک دہشت گرد انعام اللہ مارا گیا۔

آئی ایس پی آر کے مطابق ہلاک دہشت گردوں سے اسلحہ، گولہ بارود اور دھماکا خیز مواد بھی برآمد ہوا۔

ترجمان پاکستانی فوج نے کہا کہ ہلاک دہشت گرد سیکیورٹی فورسز کے خلاف دہشت گردی کی کارروائیوں اور معصوم شہریوں کی ٹارگٹ کلنگ میں ملوث تھے۔

بیان میں کہا گیا کہ سیکیورٹی فورسز نے علاقے میں موجود دیگر دہشت گردوں کے خاتمے کے لیے کلیئرنس آپریشن بھی کیا اور فورسز ملک سے دہشت گردی کے خاتمے کے لیے پرعزم ہیں۔

واضح رہے کہ 4 مئی کو سیکیورٹی فورسز نے شمالی وزیرستان میں آپریشن کے دوران دہشت گردوں کے ٹھکانے کو تباہ کرتے ہوئے 6 شدت پسندوں کو ہلاک کردیا تھا۔

یاد رہے کہ اس سے قبل 29 اپریل کو سیکیورٹی فورسز نے قبائلی ضلع خیبر میں خفیہ اطلاع پر کارروائی کے دوران 4 دہشت گرد مارے گئے تھےجن میں دو رنگ لیڈرز بھی شامل تھے۔

خیال رہے کہ 29 اپریل کو سیکورٹی فورسز نے ضلع ٹانک میں خفیہ اطلاع پر کارروائی کے دوران 4 دہشت گردوں کو ہلاک کردیا گیا تھا۔