ڈیرہ اسماعیل خان میں پولیس قافلے پر فائرنگ اور دھماکا، 4 اہلکار زخمی

ڈی آئی خان (نمائندہ ڈیلی اردو) صوبہ خیبرپختونخوا کے ضلع اسماعیل خان میں سرچ آپریشن کیلئے جانے والے پولیس قافلے پر حملے کے نتیجے میں کوئیک ری ایکشن فورس کا ڈرائیور اور تین اہلکار زخمی ہوگئے۔

پولیس کے مطابق ٹانک روڈ پر فارم ہاؤس کے قریب نامعلوم دہشت گردوں نے سڑک کنارے نصب آئی ای ڈی دھماکے کے بعد فائرنگ کی۔

پولیس اسکواڈ پر حملے کے بعد فائرنگ کا تبادلہ ہوا، جوابی فائرنگ کے بعد حملہ آور فرار ہوگئے، دھماکے اور فائرنگ سے ایک گاڑی کو نقصان پہنچا اور 4 پولیس اہلکار معمولی زخمی ہوئے جن میں کانسٹیبل محفوظ اللہ، کانسٹیبل محمد عمیر، کانسٹیبل فضل امین اور کانسٹیبل سمیع اللہ شامل ہیں۔

پولیس کے مطابق علاقے کو گھیرے میں لیکر سرچ آپریشن بھی کیا گیا ہے۔