کراچی میں نامعلوم افراد کی فائرنگ سے ایک پولیس اہلکار ہلاک، دوسرا زخمی

کراچی (نمائندہ ڈیلی اردو) صوبہ سندھ کے دارالحکومت کراچی کے علاقے سہراب گوٹھ کے قریب نامعلوم موٹر سائیکل سواروں کی فائرنگ سے ایک پولیس اہلکار ہلاک، دوسرا شدید زخمی ہوگیا یے۔

ترجمان کراچی پولیس نے ڈیلی اردو کو بتایا کہ ہلاک اور زخمی پولیس اہلکار ہیڈ کوارٹر ایسٹ زون میں تعینات تھے، اہلکاروں کو مویشی منڈی کے قریب پکٹ پر تعینات کیا گیا تھا۔

ہلاک ہونے والے پولیس اہلکار کی شناخت یٰسین اور زخمی کی شناخت عباس کے نام سے ہوئی، پولیس نے جائے وقوع سے شواہد جمع کرکے تحتقیقات شروع کردی ہیں۔

واقعہ ابتدائی طور پر ٹارگٹ کلنگ ہے، جائے وقوعہ سے 30 بور پستول کے تین خول ملے ہیں، یاسین کو دو گولیاں اور زخمی کو بھی دو گولیاں لگی ہیں۔

پولیس کے مطابق موٹر سائیکل سوار ملزمان نے 5 سے زائد فائر کیے، ہائی وے پر اہلکار پانی پی کر سائے دار مقام پر موجود تھے کہ ملزمان نے باقاعدہ نشانہ لیکر فائرنگ کی، ملزمان نے اہلکاروں کو پیچھے سے گولیاں ماریں جو کمر میں لگیں جس کے بعد ملزمان سہراب گوٹھ گنا منڈی کی جانب فرار ہوگئے۔

دوسری جانب پولیس اہلکار کی ہلاکت کے واقعہ پر صوبائی وزیر داخلہ سندھ ضیاالحسن لنجار نے ملزمان کی گرفتاری کے لیے پورے ضلع کی فورس لگانے کی ہدایت کردی۔

انہوں نے کہا کہ پولیس اہلکار کی ہلاکت میں ملوث ملزمان کی جلد سے جلد گرفتاری کو یقینی بنایا جائے، ملزمان کی گرفتاری کے لیئے دستیاب جدید ٹیکنالوجی بشمول جیو فینسنگ سے استفادہ کیا جائے۔

یاد رہے کہ گزشتہ روز کراچی کے علاقے پٹیل پاڑہ میں نامعلوم موٹر سائیکل سواروں کی فائرنگ سے قمر آزاد نامی پولیس اہلکار ہلاک ہوگیا تھا۔

پولیس کے مطابق چاروں افراد ہوٹل پر کھانا کھارہے تھے، موٹرسائیکل سوار ہیلمٹ پہنے 2 ملزمان نے ان پر اندھا دھند فائرنگ کی۔ پولیس کا کہنا ہے کہ زخمی افراد کی جوابی فائرنگ سے ملزمان فرار ہوگئے۔

زخمیوں کو جناح ہسپتال منتقل کیا گیا جہاں زخمی اہلکار زخموں کی تاب نہ لاتے ہوئے دم توڑ گیا۔