‏پاکستان نے ایٹمی دھماکوں سے خطے میں طاقت کا توازن بحال کیا، ڈی جی آئی ایس پی آر

راولپنڈی (ویب ڈیسک) پاک فوج کی جانب سے یوم تکبیر کے حوالے سے پیغام جاری کیا گیا ہے جس میں ایٹمی صلاحیت کے حصول کیلئے کوششیں کرنے والے تمام افراد، ایٹمی پروگرام کے خالق، سائنسدانوں اور انجینئرز کو سلام پیش کیا گیا ہے۔

ترجمان پاک فوج میجرجنرل بابر افتخار کی جانب سے جاری بیان میں کہا گیا ہے کہ 28 مئی کوپاکستان نے ایٹمی دھماکے کرکے خطے میں طاقت کے توازن کو بحال کیا۔

On 28 May 1998 Pak successfully established credible min nuclear deterrence & restored balance of power in the region. AFs salute all those involved from conceptualisation to actualisation especially scientists & engineers who made this possible. Long Live Pakistan. #YoumeTakbeer

— DG ISPR (@OfficialDGISPR) May 28, 2020

یوم تکبیر کے حوالے سے ٹوئٹر پر جاری اپنے بیان میں ڈائریکٹر جنرل انٹر سروسز پبلک ریلیشنز ( آئی ایس پی آر) میجر جنرل بابر افتخار کا کہنا ہے کہ پاکستان نے 28 مئی 1998 کو کامیابی سے ایٹمی تجربات کیے اور قابل اعتبار دفاعی صلاحیت حاصل کی۔

ڈی جی آئی ایس پی آر کا کہنا ہے کہ ایٹمی صلاحیت کے حصول کیلئے کوششیں کرنے والے تمام افراد کو سلام پیش کرتے ہیں۔

ان کا مزید کہنا تھا کہ ایٹمی پروگرام کے خالق، سائنسدانوں اور انجینئرز کو بھی سلام پیش کرتے ہیں، پاکستان زندہ باد۔

پاکستان کو ایٹمی قوت بنے 22 سال مکمل ہوگئے اور اسی مناسبت سے آج ملک بھر میں یومِ تکبیر منایا جارہا ہے۔

یوم تکبیر ہر سال 28 مئی کو منایا جاتا ہے اور یہ وہ یادگار دن ہے جب پاکستان دنیا کے سامنے پہلی اسلامی ایٹمی قوت بن کر ابھرا اور پاکستان نے ایٹمی تجربات کرکے ملکی دفاع ناقابل تسخیر بنادیا۔

بھارت کے ایٹمی دھماکوں کے جواب میں سابق وزیراعظم نوازشریف کے دورِ حکومت میں پاکستان نے 28 مئی 1998 کو بلوچستان کے علاقے چاغی کے مقام پر 5 کامیاب ایٹمی دھماکے کیے جس کے بعد اس دن کو ’یوم تکبیر‘ کے نام سے یاد رکھا جاتا ہے۔