اسلام آباد میں پولیس پٹرولنگ ٹیم پر فائرنگ، ایک اہلکار ہلاک، 2 اہلکار زخمی، ٹی ٹی پی نے ذمہ داری قبول کرلی

اسلام آباد (نمائندہ ڈیلی اردو) وفاقی دارالحکومت اسلام آباد کے کنٹینر چوک میں پولیس وین پر فائرنگ کے نتیجے میں ایک اہلکار ہلاک جبکہ سب انسپکٹر اور دوسرا اہلکار زخمی ہوگئے۔

پولیس کے مطابق اسلام آباد میں سیکٹر جی 13 میں کنٹینر چوک پر ایک سب انسپکٹر اور 2 پولیس کانسٹیبل معمول کی چیکنگ پر تھے کہ اہلکاروں نے اس دوران موٹرسائیکل سواروں کو روکا جس پر موٹرسائیکل پر سوار دو ملزمان نے فائرنگ کردی۔

پولیس نے بتایا کہ فائرنگ کے نتیجے میں 3 اہلکار زخمی ہوگئے۔

پولیس کا کہنا ہے کہ زخمی اہلکاروں کو طبی امداد کیلئے پمز اسپتال منتقل کیا گیا تاہم زخمی پولیس اہلکار قاسم زخموں کی تاب نہ لاتے ہوئے چل بسا۔

موٹر سائیکل سوار ملزمان کی فائرنگ کے نتیجے میں زخمی ہونے والے ہیڈ کانسٹیبل محمد قاسم زخموں کی تاب نہ لاتے ہوئے شہید ہوگئے۔

انا للہ وانا الیہ راجعون#PoliceMartyrs pic.twitter.com/GFHciVbslc

— Islamabad Police (@ICT_Police) March 7, 2021

پولیس کے مطابق پمز میں زیر علاج زخمیوں میں سب انسپکٹر جمیل اور ہیڈ کانسٹیبل قیصر شامل ہیں۔

ترجمان اسلام آباد پولیس کا کہنا ہے کہ علاقے کو گھیرے میں لیکر سرچ آپریشن شروع کردیا گیا ہے اور جلد ملزمان کو ٹریس کرکے گرفتار کیا جائے گا۔

دوسری جانب اسلام آباد پولیس نے سماجی رابطے کی ویب سائٹ ٹوئٹر پر کہا کہ ہیڈ کنسٹیبل محمد قاسم کی تدفین پورے اعزاز کے ساتھ ان کے آبائی گاؤں للیانی ضلع سرگودھا میں کردی گئی۔

اسلام آباد پولیس نے بتایا کہ ہیڈ کانسٹیبل قاسم کی نماز جنازہ پولیس لائنز ہیڈکواٹرز میں ادا کی گئی۔

نماز جنازہ میں آئی جی اسلام آباد، ڈی آئی جی آپریشنز سمیت سینئر افسران و پولیس ملازمین نے شرکت کی.

شہید ہیڈ کنسٹیبل محمدقاسم کی تدفین پورے اعزاز کے ساتھ ان کے آبائی گاؤں للیانی ضلع سرگودھا میںکردی گئی۔ایس پی صدر زون حمزہ ہمایوں نے آئی جی اسلام آبادکی طرف سے شہید کی قبر پر پھولوں کی چادر چڑھائی#IslamabadPolice #PoliceMartyrs pic.twitter.com/7BXqohxxl2

— Islamabad Police (@ICT_Police) March 8, 2021

آئی جی اسلام آباد قاضی جمیل الرحمٰن نے کہا کہ پولیس کا ہر افسر و جوان ملک و قوم کی خاطر ہمہ وقت جان نثار کرنے کو تیار ہے۔

انہوں نے کہا کہ پولیس کانسٹیبل نے شہریوں کی جان ومال کی حفاظت کی خاطر جان کا نذرانہ پیش کیا ان کی اس قربانی کو رائیگاں نہیں جانے دیں گے جبکہ کانسٹیبل کی فیملی کا ہر طرح سے خیال رکھا جائے گا۔

علاوہ ازیں آئی جی اسلام آباد قاضی جمیل الرحمٰن نے سینئر افسران کے ہمراہ وقوعہ کا جائزہ لیا اور پمز ہسپتال میں زخمی اہلکاروں کو بہترین طبی سہولیات کی فراہمی یقینی بنانے پر زور دیا۔

آئی جی اسلام آباد قاضی جمیل الرحمان سینئر افسران کے ہمراہ جائے وقوعہ گئے اور اب پمز ہسپتال میں زخمی اہلکاروں کو بہترین طبی سہولیات کی فراہمی یقینی بنانے کے لیے موجود ہیں۔

ملزمان کی گرفتاری کیلئے تمام تر وسائل بروئے کار لائے جائیں گے۔ آئی جی اسلام آباد pic.twitter.com/Ph04g05faz

— Islamabad Police (@ICT_Police) March 7, 2021

انہوں نے کہا کہ ملزمان کی گرفتاری کے لیے تمام تر وسائل بروئے کار لائے جائیں گے۔

دوسری جانب کالعدم تنظیم تحریک طالبان پاکستان (ٹی ٹی پی) نے حملے کی ذمہ داری قبول کرلی ہے۔

راولپنڈی پولیس کے انسپکٹر عمران عباس شرپسند عناصر کی فائرنگ سے شہید، ابتدائی تحقیقات کے مطابق انسپکٹر عمران عباس کو فرائض کی ادائیگی کے دوران ٹارگٹ کرکے شہید کیا گیا۔

تمام زاویوں پر تحقیقات کی جارہی ہیں، تفتیش کرکے حقائق کو سامنے لایا جائے گا۔ ایس پی پوٹھوہار pic.twitter.com/P5KUKk1NFL

— Rawalpindi Police (@RwpPolice) March 7, 2021

یاد رہے کہ گزشتہ روز راولپنڈی میں بھی ایس ایچ او عمران عباس کو قتل کیا گیا تھا، پچھلے چوبیس گھنٹوں میں کے دوران جڑواں شہروں یہ دوسرا حملہ ہے۔