بلوچستان: سبی میں سی ٹی ڈی کی کارروائی، ایک دہشت گرد ہلاک، 4 گرفتار

سبی (سید طاہر علی) کاؤنٹر ٹیررازم ڈیپارٹمنٹ (سی ٹی ڈی) نے صوبہ بلوچستان کے ضلع سبی میں کارروائی کرتے ہوئے کالعدم تنظیم کے چار دہشت گرد کو گرفتار جبکہ ایک دہشت گرد کو ہلاک کردیا گیا۔

ترجمان سی ٹی ڈی کے مطابق سبی کے علاقے بختیار آباد میں دو مطلوب دہشت گردوں ہزار خان اور حلیم کی موجودگی کی اطلاع پر علاقے کو گھیرے میں لیکر کارروائی کی گئی تو دہشت گردوں کی جانب سے اہل کاروں پر فائرنگ کی گئی۔

دونوں جانب سے فائرنگ کے تبادلے میں ایک دہشت گرد ہلاک ہوا، جب کہ 4 دہشت گردوں کو گرفتار کرلیا گیا۔

ہلاک ہونے والا دہشت گرد متعدد وارداتوں میں مطلوب تھا۔

گرفتار دہشت گردوں کے قبضے سے دو کلاشنکوف، رائفل اور دھماکا خیز مواد قبضے میں لیا گیا ہے۔