بلوچستان: چمن بارڈر پر افغان حدود سے فائرنگ، ایک ایف سی اہلکار ہلاک 2 زخمی

چمن (ڈیلی اردو) صوبہ بلوچستان کے ضلع عبد اللہ کے سرحدی شہر چمن میں پاک افغان بارڈرباب دوستی پر افغان حدود سے ہونے والی فائرنگ کے باعث ایک ایف سی اہلکار ہلاک اور 2 زخمی ہوگئے۔

لیویز حکام کے مطابق فائرنگ کے بعد پاک افغان سکیورٹی اہلکاروں میں فائرنگ کا تبادلہ ہوا، فائرنگ کے دوران باب دوستی سے آنے جانے والے پیدل شہریوں میں بھگدڑ مچ گئی۔

لیویز حکام کا کہنا ہے کہ پاکستانی حکام نے فائر بندی کے لیے افغان حکام سے رابطہ کیا ہے، واقعے کے بعد باب دوستی تجارت اور پیدل آمدورفت کے لیے بند کردیا گیا ہے، جس سے سرحد کی دونوں جانب مال بردار ٹرک اور شہری پھنس گئے ہیں۔

لیویز حکام کے مطابق باب دوستی پر پاکستان اور افغان حکام کے درمیان فلیگ میٹنگ ہوئی ہے جس میں کہا گیا ہے کہ حملہ آوروں کی حوالگی تک باب دوستی بند رہےگا۔

اس حوالے سے افغان حکام کا کہنا ہے کہ حملہ آور طالبان کے بھیس میں نامعلوم دہشت گرد تھے، ان کی تلاش جاری ہے۔

دوسری جانب کسٹم حکام کا کہنا ہے کہ افغان حدود سے فائرنگ کے باعث کسٹم ہاؤس خالی کیا جا رہا ہے، کسٹم اور امیگریشن اسٹاف کو فوری طور پر نکال دیا گیا ہے۔

ادھر ڈپٹی کمشنر چمن حمید زہری کا کہنا ہے کہ پاک افغان بارڈر باب دوستی غیر معینہ مدت تک بند رہے گا۔