خلیجِ فارس میں قطری ایل این جی بردار جہاز پر نامعلوم اشیا سے حملہ، عملہ محفوظ

دوحہ(ڈیلی اردو) خلیجِ فارس میں قطر کی مائع قدرتی گیس (ایل این جی) لے جانے والی ایک بحری جہاز کو نامعلوم اشیا سے نشانہ بنایا گیا ہے۔ قطری گیس ٹرانسپورٹ کمپنی ’’نقیلات‘‘ کے مطابق واقعہ جمعے کی شام 30 اکتوبر کو پیش آیا، جب اس کا جہاز ’’المعیدہ‘‘ خلیج کے پانیوں سے گزر رہا تھا۔

قطر کی سرکاری خبر رساں ایجنسی کے مطابق حملے میں جہاز کے کسی بھی اہلکار کو نقصان نہیں پہنچا اور نہ ہی سمندر یا ماحول میں آلودگی کی کوئی اطلاع ملی۔ کمپنی نے بتایا کہ جہاز محفوظ ہے اور کام کرنے کی حالت میں موجود ہے، تاہم واقعے کے اثرات اور ممکنہ نقصان کا جائزہ لیا جا رہا ہے۔ نقیلات نے جہاز کے عملے اور متعلقہ علاقائی بحری سلامتی کے اداروں سے رابطہ برقرار رکھنے کی بھی تصدیق کی ہے۔

عالمی میڈیا رپورٹس کے مطابق یہ واقعہ ایسے وقت پیش آیا ہے جب مشرقِ وسطیٰ میں جاری جنگ کے باعث خلیجِ فارس اور آبنائے ہرمز میں تجارتی جہازوں کی آمدورفت کو شدید خطرات لاحق ہیں۔ الجزیرہ کی رپورٹ میں بین الاقوامی بحری اداروں اور برطانوی بحری تجارتی آپریشنز کے اعداد و شمار کا حوالہ دیتے ہوئے بتایا گیا ہے کہ جنگ شروع ہونے کے بعد سے 120 سے زائد تجارتی جہاز حملوں کی زد میں آ چکے ہیں، جبکہ اکتوبر کے دوران کم از کم 29 جہازوں کو نشانہ بنایا گیا۔

رپورٹس کے مطابق ایران نے آبنائے ہرمز سے گزرنے والے جہازوں کے لیے اپنی اجازت کو ضروری قرار دیا ہے، جبکہ امریکہ نے ایرانی بندرگاہوں کی بحری ناکہ بندی کر رکھی ہے۔ اس کشیدہ صورتحال نے عالمی توانائی کی ترسیل اور تیل و گیس کی تجارت کے لیے اہم سمندری راستے پر غیر یقینی صورتحال پیدا کر دی ہے۔

قطر، جو امریکہ اور ایران کے درمیان ثالثی کی کوششوں میں کردار ادا کر رہا ہے، حالیہ دنوں میں مذاکرات کی بحالی کے لیے سفارتی رابطے بھی تیز کر چکا ہے۔ تاہم قطری جہاز پر حملے کی ذمہ داری تاحال کسی فریق نے قبول نہیں کی اور نہ ہی حملے کے مقام، طریقہ کار یا استعمال ہونے والے پروجیکٹائل کی نوعیت سے متعلق مزید تفصیلات سامنے آئی ہیں۔