کینیڈا کا ایران کے خلاف نیا اقدام، تیل، بینکاری اور جوہری شعبوں سے وابستہ 11 اداروں پر پابندیاں بحال

پیرس (ڈیلی اردو) کینیڈا نے ایران کے توانائی، بینکاری اور جوہری شعبوں سے منسلک 11 اداروں پر پابندیاں دوبارہ نافذ کردی ہیں۔ اوٹاوا کے مطابق ان اداروں پر ایران کے جوہری اور بیلسٹک میزائل پروگراموں میں معاونت اور متعلقہ مالیاتی سرگرمیوں میں ملوث ہونے کے الزامات ہیں۔

کینیڈا کی وزیرِ خارجہ انیتا آنند نے پیرس میں جی سیون ممالک کے وزرائے خارجہ کے اجلاس کے موقع پر پابندیوں کی بحالی کا اعلان کیا۔ ان کے مطابق اس اقدام کا مقصد ایران کے ان مالیاتی نیٹ ورکس کی سرگرمیاں محدود کرنا ہے جن کے ذریعے جوہری پروگرام کے لیے فنڈز اور حساس ٹیکنالوجی فراہم کیے جانے کا خدشہ ہے۔

پابندیوں کی زد میں آنے والے اداروں میں نیشنل ایرانی آئل کمپنی، نیشنل ایرانی ٹینکر کمپنی، بینک ملی، بینک ملت، ایران انشورنس کمپنی اور جوہری ایندھن و توانائی سے متعلق ادارے شامل ہیں۔ کینیڈین حکومت کے مطابق ان اداروں پر عائد پابندیاں 2016 میں ایران اور عالمی طاقتوں کے درمیان 2015 کے جوہری معاہدے کے بعد ختم کی گئی تھیں۔

خبر رساں ادارے روئٹرز کے مطابق کینیڈا نے پابندیوں کی بحالی کی وجہ بین الاقوامی جوہری توانائی ایجنسی کے ساتھ ایران کے تعاون میں بار بار سامنے آنے والی ناکامیوں اور اس کے جوہری پروگرام سے متعلق خدشات کو قرار دیا ہے۔ نئے اقدامات کے تحت کینیڈا میں موجود افراد اور کینیڈین شہریوں کے لیے بیرونِ ملک بھی نامزد اداروں کے ساتھ مخصوص مالیاتی اور جائیداد سے متعلق لین دین پر پابندیاں عائد ہوں گی۔

وزیرِ خارجہ انیتا آنند نے کہا کہ کینیڈا ایران کو جوہری ہتھیار حاصل کرنے سے روکنے کے لیے اپنے جی سیون شراکت داروں اور عالمی برادری کے ساتھ مل کر کام جاری رکھے گا، تاہم ان کا کہنا تھا کہ اوٹاوا اب بھی ایک جامع، قابلِ تصدیق اور دیرپا جوہری معاہدے کا خواہاں ہے۔

دوسری جانب ایران مسلسل یہ مؤقف اختیار کرتا آیا ہے کہ اس کا جوہری پروگرام پُرامن مقاصد کے لیے ہے اور وہ جوہری ہتھیار بنانے کی کوشش نہیں کر رہا۔ کینیڈا کا تازہ اقدام ایسے وقت میں سامنے آیا ہے جب امریکہ اور ایران کے درمیان جوہری مذاکرات اور پابندیوں کے خاتمے کے معاملے پر اختلافات برقرار ہیں۔