شام: کرد فورسز اور داعش کے درمیان جونریز جھڑپیں، 28 اہلکار اور 56 جنگجو ہلاک

دمشق (ڈیلی اردو) شمالی شامی علاقے الحسکہ میں کرد فورسز کے زیر قبضہ جیل پر داعش کے جنگجوؤں کے حملے کے بعد سے شروع ہونے والی خونریز جھڑپیں تیسرے روز بھی جاری ہیں۔

شامی مبصر گروپ سیریئن آبزرویٹری فار ہیومن رائٹس کے مطابق اب تک اس پرتشدد سلسلے میں قریب 90 افراد ہلاک ہو چکے ہیں۔

آبزرویٹری کے مطابق ہلاک شدگان میں کم از کم 28 کرد سکیورٹی اہلکار ہیں جب کہ 56 جہادی بھی اس لڑائی میں مارے گئے ہیں۔ داعش کے جنگجوؤں نے جمعرات کی شب اپنے ساتھیوں کی رہائی کے لیے اس جیل پر حملہ کیا تھا، جہاں اس جہادی گروہ کے قریب 35 سو ارکان قید ہیں، جن میں بعض سرکردہ لیڈر بھی شامل ہیں۔ بتایا گیا ہے کہ اس جیل سے فرار ہونے والے سینکڑوں افراد کو دوبارہ گرفتار کر لیا گیا ہے، جب کہ درجنوں تاحال فرار ہیں۔