لاہور میں دہشتگردی کا بڑا منصوبہ ناکام، داعش کے 5 دہشت گرد گرفتار

اسلام آباد (ش ح ط) کاؤنٹر ٹیررازم ڈیپارٹمنٹ (سی ٹی ڈی) نے صوبہ پنجاب کے صوبائی دارالحکومت لاہور میں کارروائی کرتے ہوئے کالعدم تنظیم دولت اسلامیہ (داعش) کے پانچ دہشت گردوں کو گرفتار کر لیا۔

ترجمان سی ٹی ڈی کے مطابق کاؤنٹر ٹیررازم ڈیپارٹمنٹ اور حساس ادارے نے بھٹہ چوک کے قریب انٹلیجنس بیس آپریشن کے دوران کامیاب کاروائی کرتے ہوئے دہشت گردی کا بڑا منصوبہ ناکام بنا دیا۔

سی ٹی ڈی کے مطابق گرفتار دہشت گردوں کا تعلق عالمی کالعدم تنظیم دولت اسلامیہ (داعش) سے ہے، گرفتار دہشت گردوں میں ناظف اللہ، ضیا الرحمن، اشتیاق، عبدالرحمان اور ملک کاشف شامل ہیں۔

سی ٹی ڈی کے مطابق دہشت گردوں سے ایسی 40 کتابیں برآمد کی گئیں جن پر پابندی عائد ہے۔

مبینہ دہشت گردوں کے قبضے سے ممنوعہ لٹریچر، چندہ رسیدیں بھی برآمد ہوئیں، دہشت گردوں کے خلاف تھانہ سی ٹی ڈی میں مقدمہ درج کر لیا ہے۔

سی ٹی ڈی نے ملزمان کو مزید تحقیقات کے لئے نامعلوم مقام پر منتقل کردیا ہے، ملزمان سے مزید انکشافات کی توقع ہے۔