پنجاب: قصور میں نامعلوم موٹرسائیکل سواروں کی فائرنگ سے پولیس اہلکار ہلاک

لاہور (ڈیلی اردو) صوبہ پنجاب کے ضلع قصور کی تحصیل پتوکی میں نامعلوم موٹرسائیکل سواروں نے فائرنگ کر کے پولیس اہلکار کو ہلاک کردیا۔

پنجاب پولیس کے مطابق پولیس کانسٹیبل وسیم شہزاد لاہور میں بطور ڈرائیور ایم ٹی برانچ میں تعینات تھا، مقتول ڈیوٹی ختم کرنے کے بعد نامعلوم موٹرسائیکل پر سوار ہوکر واپس اپنے گاؤں ’’جاگو والا چک‘‘ جا رہا تھا کہ پتوکی تحصیل کچہری کے قریب دو نامعلوم موٹرسائیکل سواروں نے فائرنگ کرکے اسے ہلاک کردیا۔

پتوکی:نامعلوم افراد کی فائرنگ سے پولیس کانسٹیبل وسیم شہزاد جاں بحق، اہلکار لاہور انویسٹی گیشن برانچ کا ملازم اور پتوکی کے نواحی علاقہ جاگوالا چک4 کا رہائشی جبکہ سب انسپکٹر بشیر احمد کا بیٹا تھا، واقعہ نیشنل ہائی وے نیو جوڈیشل کمپلیکس کے قریب پیش آیا

@inamkhan24 @OfficialDPRPP pic.twitter.com/6mz70ETpDN

— KasurUpdates (Shahzad Rehmat) (@kasurupdates) December 4, 2022

پولیس کے مطابق واردات کے بعد ملزمان فرار ہونے میں کامیاب ہوگئے، پولیس نے مقتول اہلکار کی لاش کو پوسٹ مارٹم کیلئے ٹی ایچ کیو اسپتال پتوکی منتقل کردیا ہے۔

پولیس کا کہنا ہے کہ تھانا صدر پتوکی پولیس نے مقتول کے بھائی کی مدعیت میں نامعلوم ملزمان کے خلاف مقدمہ درج کرکے تفتیش شروع کردی ہے۔