کراچی: سی ٹی ڈی کا سپاہ محمد کے 2 مبینہ دہشت گرد گرفتار کرنے کا دعویٰ

اسلام آباد (ش ح ط) کائونٹر ٹیرارزم ڈیپارٹمنٹ (سی ٹی ڈی) اور حساس ادارے نے ٹارگٹ کلنگ میں ملوث کالعدم تنظیم سپاہ محمد کے دو دہشت گردوں کو گرفتار کرنے کا دعوی کیا ہے۔

سی ٹی ڈی ترجمان کا کہنا تھا کہ خفیہ معلومات پر سندھ کے صوبائی حکومت کراچی کے علاقے سائٹ ایریا پر کارروائی کی گئی اور 2 مشتبہ افراد کو گرفتار کرلیا گیا۔

ان کا کہنا تھا کہ گرفتار ملزمان کی شناخت سید محمد علی رضا نقوی اور آغا حسن کے نام سے ہوئی۔

ترجمان کے مطابق مقابلے کے دوران ملزمان کے دیگر 2 ساتھی کرار حسین اور اوسط علی رضوی فرار ہوگئے۔ فرار ہونے والا اوسط علی رضوی کالعدم تنظیم کی جانب سے پاکستان کا ایک منظم سلیپر سیل چلا رہا تھا۔

ان کا کہنا تھا کہ ملزمان نے پانچ افراد کی ٹارگٹ کلنگ کا اعتراف کیا ہے۔

سی ٹی ڈی حکام کا کہنا ہے کہ ملزم ٹارگٹ کی ریکی کروا کر ٹارگٹ کلنگ کرواتا تھا۔ ملزم نے سال 2011 میں ڈاکٹر محمود کو شمسی ہسپتال کے باہر ٹارگٹ کر کے قتل کیا۔ سال 2012 میں شاہد آٹوز کے مالک شاہد کو طیارے والی چورنگی پر ٹارگٹ کر کے قتل کیا۔ سال 2013 میں عیسیٰ بلوچ کو کلفٹن میں ٹارگٹ کرکے قتل کیا گیا۔

جاری بیان کے مطابق سال 2014 میں 2 بھائیوں محمد تنویر اور محمد توصیف کو ملیر کھوکرا پار بیکری میں ٹارگٹ کر کے قتل کیا۔ فرار دہشت گرد علی اوسط کارروائی کیلئے 25000 روپے ماہانہ دیتا تھا۔ انچارج سی ٹی ڈی کے مطابق ملزمان سے مزید تفتیش کی جارہی ہے۔

علاوہ ازیں یہ دعویٰ بھی کیا گیا کہ گرفتار ملزمان کے قبضے سے دو نائن ایم ایم پستول اور 6 عدد گولیاں برآمد ہوئے ہیں۔