آسٹریلیا: اسرائیلی صدر کے دورے کیخلاف ہزاروں افراد کا احتجاج، متعدد گرفتار

سڈنی(ڈیلی اردو) پیر کے روز آسٹریلیا بھر میں ہزاروں افراد نے اسرائیلی صدر آئزک ہرزوگ کی آمد کے خلاف احتجاج کیا۔ ہرزوگ آسٹریلیا کی یہودی برادری سے اظہار یکجہتی کے لیے کئی شہروں کے دورے پر ہیں، جنہیں وزیر اعظم انتھونی البانیزی نے دعوت دی ہے۔

خیال رہے کہ 14 دسمبر کو سڈنی کے بونڈائی بیچ پر یہودیوں کے تہوار ہنوکا کی ایک تقریب میں ہونے والی فائرنگ کے نتیجے میں 15 افراد ہلاک ہوئے تھے۔

ہرزوگ کے دورے کے خلاف احتجاج میں شامل گروپ اور شہری انہیں غزہ میں شہریوں کی ہلاکتوں میں شراکت داری کا الزام دیتے ہیں۔ فلسطین کے حق میں سرگرم گروپوں نے پیر کی شام ملک کے مختلف شہروں اور قصبوں میں مظاہرے کیے۔

سڈنی میں مظاہرین شہر کے مرکزی کاروباری علاقے کے ایک چوک میں جمع ہوئے، فلسطین کے حق میں نعرے لگائے اور تقاریر سنیں۔ مظاہرہ میں شامل 30 سالہ جیکسن ایلیٹ نے کہا:“بونڈائی قتلِ عام خوفناک تھا، لیکن ہماری آسٹریلوی قیادت نے فلسطینی عوام اور غزہ کے لوگوں کی جدوجہد کو تسلیم نہیں کیا۔”

احتجاج کے دوران پولیس کی بھاری نفری، ہیلی کاپٹر اور گھڑ سوار اہلکار موجود تھے۔ مظاہرین کو آگے بڑھنے اور حفاظتی حصار توڑنے سے روکنے کے لیے پولیس نے مرچوں کے اسپرے اور آنسو گیس کا استعمال کیا، اور جھڑپوں کے دوران متعدد افراد کو گرفتار بھی کیا گیا۔

دوسری جانب یہودی برادری کے ہزاروں افراد، حکومتی عہدیداروں اور اپوزیشن سیاست دانوں نے احتجاجی مقام سے ایک کلومیٹر سے زائد فاصلے پر ہونے والی تقریب میں صدر ہرزوگ کا خیرمقدم کیا، جہاں بونڈائی حملے کے متاثرین کو خراجِ عقیدت پیش کیا گیا۔