اسرائیل کا مشرق وسطیٰ کی زمین پر حق ہے، امریکی سفیر مائیک ہکابی

یروشلم (ڈیلی اردو) عرب اور مسلم ممالک نے اسرائیل میں تعینات امریکی سفیر مائیک ہکابی کے اُس بیان کی شدید مذمت کی ہے، جس میں انہوں نے کہا تھا کہ بائبل کی بنیاد پر اسرائیل کو مشرق وسطیٰ کے بڑے حصوں پر حق حاصل ہے۔

جمعہ کو دائیں بازو کے مبصر ٹکر کارلسن کے ساتھ شائع ہونے والے ایک انٹرویو میں ہکابی سے پوچھا گیا کہ اگر بائبل کی لفظی تشریح کی جائے، تو کیا اسرائیل کو جدید مشرق وسطیٰ کے بڑے حصوں پر اپنا دعویٰ کرنے کا حق ہے؟

اس پر ہکابی نے جواب دیا، ’’اگر وہ سب کچھ لے لیں تو ٹھیک ہے۔‘‘ بعد میں انہوں نے اپنے بیان میں نرمی لاتے ہوئے کہا کہ یہ سوال غیر متعلقہ ہے کیونکہ اسرائیل کی ایسی کوئی خواہش نہیں ہے۔ تاہم ان کا کہنا تھا کہ اسرائیل کو “اس زمین پر رہنے کا حق ہے، جو اس کے پاس فی الحال ہے”

سعودی عرب کی وزارت خارجہ کی جانب سے ایکس پر جاری کردہ ایک مشترکہ بیان میں کئی عرب اور مسلم ممالک کے وزرائے خارجہ ( اسلامی تعاون کی تنظیم، عرب لیگ اور خلیجی تعاون کونسل) نے ان بیانات کی ’’شدید مذمت‘‘ کرتے ہوئے ’’گہری تشویش‘‘ کا اظہار کیا ہے۔

اس بیان میں ہکابی کے بیانات کو بین الاقوامی قانون اور اقوام متحدہ کے چارٹر کی ’’کھلی خلاف ورزی‘‘ قرار دیا گیا ہے۔

اس بیان کی توثیق سعودی عرب، مصر، اردن، متحدہ عرب امارات، انڈونیشیا، پاکستان، قطر، ترکی، کویت، بحرین، عمان، لبنان، شام اور فلسطین نے کی۔

1948ء میں اسرائیل کے قیام سے اب تک اس کی مکمل طور پر تسلیم شدہ سرحدیں نہیں ہیں۔ 1967ء کی چھ روزہ جنگ میں اسرائیل نے مغربی کنارے اور مشرقی یروشلم سمیت دیگر علاقوں پر بھی قبضہ کر لیا تھا، جہاں اب بھی تقریباً سات لاکھ اسرائیلی آبادکار تقریباً 30 لاکھ فلسطینیوں کے درمیان رہتے ہیں۔

میڈیا رپورٹوں کے مطابق اسرائیلی حکومت نے حال ہی میں ایک تجویز کی منظوری دی ہے، جس کا مقصد مغربی کنارے میں اسرائیلی آبادکاروں کے لیے زمین خریدنا آسان بنانا ہے۔ جرمنی اور دیگر ممالک نے اس اقدام کی شدید مذمت کی ہے۔