اقوام متحدہ کی اسلام آباد شیعہ مسجد پر داعش کے حملے کی شدید مذمت

نیویارک (نمائندہ ڈیلی اردو) اقوام متحدہ کی سلامتی کونسل نے اسلام آباد کے علاقے ترلائی میں جمعے کی نماز کے دوران شیعہ مسجد خدیجۃ الکبریٰ پر ہونے والے خودکش حملے کی سخت ترین الفاظ میں مذمت کی اور اسے عالمی امن کے لیے سنگین خطرہ قرار دیا ہے۔

نیویارک میں جاری کردہ بیان میں کونسل کے ارکان نے اس گھناؤنے حملے میں قیمتی جانوں کے ضیاع پر گہرے دکھ کا اظہار کیا۔ سلامتی کونسل نے حکومتِ پاکستان اور متاثرہ خاندانوں کے ساتھ دلی تعزیت کی اور زخمیوں کی جلد صحت یابی کے لیے نیک خواہشات کا اظہار کیا۔

کونسل نے مطالبہ کیا کہ اس بزدلانہ کارروائی کے ذمہ داروں، سہولت کاروں اور ماسٹر مائنڈز کو فوری طور پر انصاف کے کٹہرے میں لایا جائے۔ ارکان نے کہا کہ دہشت گردی کا کوئی بھی اقدام، چاہے کسی بھی مقصد کے لیے ہو، مکمل طور پر مجرمانہ اور بلاجواز ہے۔

اعلامیے میں کہا گیا کہ دہشت گردی کی تمام اشکال بین الاقوامی امن و سلامتی کے لیے سب سے بڑا خطرہ ہیں، اور تمام ریاستوں پر زور دیا گیا کہ وہ بین الاقوامی قوانین اور اقوام متحدہ کی قراردادوں کے مطابق دہشت گردی کے خاتمے میں اپنا فعال کردار ادا کریں۔

سلامتی کونسل نے عالمی برادری سے بھی اپیل کی کہ وہ پاکستان کی حکومت اور متعلقہ حکام کے ساتھ تعاون کرے تاکہ دہشت گردی کی بیخ کنی ممکن ہو سکے۔