ایران کی دھمکی: حملے کی صورت میں اسرائیل اور امریکی اڈے ”جائر ہدف“!

تہران (ڈیلی اردو) تہران نے خبردار کیا ہے کہ اگر امریکہ ایران پر حملہ کرتا ہے تو ایران اسرائیل اور امریکی اڈوں کو نشانہ بنائے گا۔ دوسری جانب اسرائیلی ذرائع کا کہنا ہے کہ ممکنہ امریکی مداخلت کے تناطر میں اسرائیل ہائی الرٹ پر ہے۔

ایرانی پارلیمنٹ کے اسپیکر محمد باقر قالیباف نے اتوار کو پارلیمنٹ میں تقریر کرتے ہوئے امریکہ کو ’’غلط اندازے‘‘ لگانے سے خبردار کیا ہے۔ انہوں نے کہا، ’’ہم واضح کر دیتے ہیں کہ ایران پر حملے کی صورت میں مقبوضہ علاقے (اسرائیل) کے ساتھ ساتھ تمام امریکی اڈے اور بحری جہاز ہمارے جائز ہدف ہوں گے۔‘‘ قالیباف پاسداران انقلاب کے سابق کمانڈر ہیں۔

دوسری جانب تین اسرائیلی ذرائع، جو اختتام ہفتہ پر اسرائیلی سلامتی کے اجلاسوں میں موجود تھے، نے نیوز ایجنسی روئٹرز کو بتایا کہ اسرائیل کسی ممکنہ امریکی مداخلت کے تناظر میں ہائی الرٹ پر ہے۔ 

تاہم انہوں نے مزید تفصیلات فراہم نہیں کیں۔ قبل ازیں صدر ڈونلڈ ٹرمپ نے ہفتے کو سوشل میڈیا پر پوسٹ کیا تھا، ’’ایران آزادی کی طرف دیکھ رہا ہے، شاید پہلے کبھی نہیں دیکھی۔ امریکہ مدد کے لیے تیار ہے!‘‘  

ایک اسرائیلی ذریعے نے، جو گفتگو میں موجود تھا، نے تصدیق کی ہے کہ ہفتے کو ایک فون کال میں اسرائیلی وزیراعظم بینجمن نیتن یاہو اور امریکی وزیر خارجہ مارکو روبیو نے ایران میں ممکنہ امریکی مداخلت پر بات چیت کی ہے۔ ایک دوسرے امریکی اہلکار نے دونوں کے درمیان گفتگو کی تصدیق تو کی ہے لیکن موضوعات نہیں بتائے۔

 اسرائیلی فوج نے اس حوالے سے تبصرے کی درخواست کا فوری جواب نہیں دیا۔

دریں اثناء 28 دسمبر کو شروع ہونے والے احتجاجی مظاہرے ایران بھر میں پھیلتے جا رہے ہیں۔ یہ مظاہرے ابتدا میں بڑھتی ہوئی مہنگائی کے خلاف تھے لیکن جلد ہی سیاسی رنگ اختیار کر گئے اور مظاہرین نے مذہبی حکومت کے خاتمے کا مطالبہ شروع کر دیا۔ ایرانی حکام امریکہ اور اسرائیل پر ملک میں بدامنی بھڑکانے کا الزام لگاتے ہیں۔

دوسری جانب جمعرات سے حکام کی جانب سے نافذ کردہ انٹرنیٹ بلیک آؤٹ کی وجہ سے ایران سے معلومات کا بہاؤ متاثر ہوا ہے۔ امریکہ میں قائم انسانی حقوق کے گروپ ایچ آر اے این اے کے مطابق ہلاکتوں کی تعداد 500 تک پہنچ گئی ہے، جن میں زیادہ تر مظاہرین شامل ہیں، جبکہ 114 سکیورٹی اہلکار بھی مارے گئے ہیں۔