جنوبی وزیرستان میں دھماکا، حکومت کے حامی قبائلی رہنما سمیت 4 افراد ہلاک

اسلام آباد (ش ح ط) صوبہ خیبر پختونخوا کے قبائلی ضلع جنوبی وزیرستان میں ہونے والے ایک بم حملے میں طالبان مخالف ایک قبائلی رہنما انکے بیٹے سمیت 4 افراد ہلاک ہوگئے ہیں۔

https://twitter.com/ShabbirTuri/status/1727376869325259006?t=_w7_nEYcCmu07f9xMrLXxA&s=19

جنوبی وزیرستان میں حکام کا کہنا ہے کہ ایک دکان میں ہونیوالے بم دھماکے میں حکومت کے حامی قبائلی رہنما و صدارتی ایوارڈ یافتہ ملک اسلم وزیر اپنے جوان بیٹے سمیت 4 افراد ہلاک ہوگئے ہیں۔

حکام کا مزید کہنا ہے کہ ہلاک ہونے والوں میں ملک اسلم وزیر اور ان کا بیٹا، ایک گن مین اور ایک دکاندار شامل ہیں۔

ملک اسلم نور وزیر کا تعلق غنی خیل قبیلے سے تھا اور وہ طالبان عسکریت پسندوں کے خلاف قائم کردہ کمیٹی کے سربراہ بھی تھے۔

ڈیلی اردو کے مطابق ملک اسلم وزیر حکومت کے حامی قبائلی سردار تھے اور وہ وزیرستان میں شدت پسندوں کے خلاف بنائے گئے لشکر کے سربراہ بھی تھے۔

مقامی لوگوں کا کہنا ہے کہ ملک اسلم وزیر علاقے میں شدت پسندوں کے خلاف جاری سرگرمیوں میں پیش پیش تھے۔

حکومت کے لئے غیر متزلزل حمایت کی وجہ سے انہیں شدت پسندوں کی جانب سے کئی بار نشانہ بنایا گیا جس میں وہ شدید زخمی ہوئے تھے۔ ان کی ہمت اور شجاعت کی وجہ سے انہیں صدارتی ایوارڈ سے بھی نوازا گیا تھا۔

قبائلی رہنما پر بم حملے کے بعد پولیس اور سکیورٹی فورسز نے جائے وقوع پر پہنچ کر علاقے کو گھیرے میں لے لیا اور سرچ آپریشن شروع کردیا۔