خامنہ ای ہلاکت کے بعد کشیدگی میں اضافہ؛ ایران کے حملوں میں 3 امریکی فوجی ہلاک، 5 زخمی

واشنگٹن (ڈیلی اردو/روئٹرز/اے پی/اے ایف پی) امریکہ نے کہا ہے کہ ایران کے ‌خلاف عسکری مہم اور لڑائی میں اس کے تین فوجی مارے گئے ہیں، جو اس تنازعے میں اولین امریکی فوجی ہلاکتیں ہیں۔ اسی دوران ایران نے اسرائیل اور خطے میں امریکی فوجی اہداف پر حملے وسیع کر دیے ہیں۔

امریکہ کی طرف سے اس کے اور اسرائیل کے ایران کے ساتھ تازہ ترین فوجی تصادم میں ان امریکی ہلاکتوں کی تصدیق ایسے وقت پر کی گئی ہے، جب اتوار یکم مارچ کے دن ایران نے یہ تصدیق کر دی کہ ایرانی سپریم لیڈر آیت اللہ علی خامنہ ای ایک اسرائیلی حملے میں کئی دیگر انتہائی سرکردہ ایرانی شخصیات کے ساتھ مارے گئے ہیں۔

خامنہ ای کی ہلاکت کی تصدیق کے بعد ایران نے اسرائیل پر اور خطے میں امریکی فوجی اہداف پر اپنے راکٹ اور میزائل حملے بھی تیز کر دیے ہیں۔

دریں اثناء امریکہ کی طرف سے یہ بھی کہا گیا ہے کہ ایران کے خلاف عسکری کارروائیوں میں شریک اس کے تین فوجی مارے گئے اور متعدد دیگر زخمی ہو گئیے ہیں، لیکن ساتھ ہی یہ بھی کہا گیا ہے کہ ایران کے خلاف امریکی اسرائیلی فضائی حملوں کے ابتدائی مرحلے میں امریکہ نے ایک ایرانی بحری جہاز کو بھی خلیج عمان میں نشانہ بنایا۔

امریکی فوج کی سینٹرل کمانڈ کی طرف سے ایکس پر ایک پوسٹ میں لکھا گیا، ’’یہ ایرانی بحری جہاز اب ڈوبتا ہوا خلیج عمان کے پانیوں کی تہہ کے قریب تر ہوتا جا رہا ہے۔‘‘