شمالی وزیرستان میں تحریک طالبان پاکستان کا اہم کمانڈر ہلاک

راولپنڈی (کاشف محمود) صوبہ خیبر پختونخوا کے قبائلی ضلع شمالی وزیرستان میں سیکیورٹی فورسز کے آپریشن میں کالعدم تنظیم تحریک طالبان پاکستان (ٹی ٹی پی) کا اہم کمانڈر مارا گیا۔

پاکستان فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق سکیورٹی فورسز نے شمالی وزیرستان کے علاقے بویا میں آپریشن کیا، آپریشن دہشتگردوں کی موجودگی کی اطلاع پر کیا گیا تھا۔

آئی ایس پی آر کے مطابق فائرنگ کے تبادلے میں اہم کمانڈر اشرف اللہ عرف طوفانی مارا گیا۔

آئی ایس پی آر کے مطابق دہشتگرد اشرف اللہ کالعدم ٹی ٹی پی کا سرگرم کمانڈر تھا، اشرف اللہ ٹارگٹ کلنگ، سکیورٹی فورسز پر حملوں اور بھتہ خوری میں ملوث تھا اور خود ساختہ بم نصب کرنے کا ماہر تھا۔