طرابلس: لیبیا میں سیکیورٹی چیک پوسٹ پر خودکش کار بم دھماکا، 2 اہلکار ہلاک، 5 زخمی

طرابلس (ڈیلی اردو) لیبیا کے جنوبی صوبہ فیضان کے دارالحکومت سبھا میں سکیورٹی چیک پوسٹ پر کار بم دھماکے میں 2 سکیورٹی اہلکار ہلاک اور 5 زخمی ہو گئے ہیں۔

فرانسیسی خبر رساں ادارے اے ایف پی کے مطابق سبھا پولیس کے عہدیدار نے بتایا کہ یہ کار بم دھماکہ گزشتہ شام کو لیبیا کے دارالحکومت طرابلس سے 750 کلومیٹر کے فاصلے پر واقع جنوب مغربی شہر سبھا میں اس وقت ہوا جب ایک کار سکیورٹی فورسز کی جانب سے لگائی گئی رکاوٹوں سے گزر رہی تھی، دھماکے کے نتیجے میں 2 سکیورٹی اہلکار ہلاک اور 5 زخمی ہو گئے جبکہ سکیورٹی فورسز کی گاڑیوں کو بھی نقصا پہنچا۔ دھماکے کی ذمہ داری کسی نے قبول نہیں کی۔

لیبیا کے وزیراعظم عبدالحامد دبیباہ نے اپنے ٹویٹ میں دھماکے کی شدید مذمت کرتے ہوئے دہشت گردی کے خلاف جنگ جاری رکھنے کے عزم کا اعادہ کیا۔