پنجاب: چکوال میں مدرسے کے کمسن طالب علم کی بوری بند لاش برآمد، زیادتی کی تصدیق

چکوال (ڈیلی اردو) پاکستان کے صوبہ پنجاب کے ضلع چکوال میں مدرسے کا کمسن بچے کو زیادتی کے بعد ہلاک کردیا گیا۔

چکوال کے تھانا صدر کی حدود میں کھیت سے ایک کمسن لڑکے کی بوری بند اور مسخ شدہ لاش برآمد ہوئی ہے۔ 

پولیس کے مطابق مقتول کی شناخت 10 سالہ مزمل یعقوب کے نام سے ہوئی ہے، جو ایک مقامی مدرسے کا طالب علم تھا۔

پولیس کا کہنا ہے کہ مذمل یعقوب 8 فروری کی رات گھر سے نکلنے کے بعد لاپتہ ہو گیا تھا، جبکہ اس کی گمشدگی کا مقدمہ 10 فروری کو تھانا صدر میں درج کیا گیا۔

ابتدائی تحقیقات کے مطابق بچے کو مبینہ طور پر زیادتی کا نشانہ بنانے کے بعد تشدد کر کے ہلاک کیا گیا۔ لاش کے بعض اعضا مسخ شدہ حالت میں پائے گئے ہیں۔ 

عینی شاہدین کے مطابق نواحی گاؤں موہڑہ تھنیل کے باہر السی کے کھیت میں صبح سویرے ایک کسان نے انسانی جسم کا اوپری دھڑ دیکھا، جس کی کھال اتری ہوئی تھی اور چہرہ ناقابل شناخت تھا۔ پولیس کے مطابق گوشت و پوست کا زیادہ حصہ کتوں، چیل اور کووں نے کھا لیا تھا۔

لاش کے قریب کپڑے اور سویٹر بھی ملے، جن سے معلوم ہوا کہ مقتول ایک مدرسے کا کمسن طالب علم تھا، جو پچھلے دو دن سے چھٹی پر اپنے گھر آیا ہوا تھا۔ قریب کے گاوں کے ایک شخص نے بعد میں کپڑوں کی مدد سے اپنے گمشدہ بیٹے کی شناخت کی۔

ایس ایچ او صدر زاہد اقبال کا کہنا ہے کہ واقعے کی مکمل نوعیت جاننے کے لیے ڈی این اے ٹیسٹ کرایا جائے گا۔

پولیس کے مطابق مقتول کے والد نے کپڑوں کی مدد سے بیٹے کی شناخت کی۔ لاش کو پوسٹ مارٹم کے لیے اسپتال منتقل کر دیا گیا ہے جبکہ واقعے کی مختلف پہلوؤں سے تحقیقات جاری ہیں۔

واقعے کے بعد علاقے میں شدید غم و غصہ پایا جاتا ہے۔