ڈیرہ اسماعیل خان میں چیک پوسٹ پر حملہ، سیکورٹی اہلکار ہلاک، پولیس کی فائرنگ سے 2 مزدور ہلاک

پشاور (بیورو رپورٹ) صوبہ خیبر پختونخوا کے ضلع ڈیرہ اسماعیل خان میں پولیس چیک پوسٹ پر دہشت گردوں نے حملہ کیا ہے۔ جس کے نتیجے میں ایک سکیورٹی اہلکار سمیت تین افراد ہلاک ہوگئے۔

ڈی ایس پی حافظ عدنان نے صحافیوں کو بتایا کہ گزشتہ رات دہشتگردوں نے ابا شہید چیک پوسٹ پر حملہ کیا جس پر کوئیک رسپانس فورس نے بھرپور جوابی کارروائی کی۔

ڈی ایس پی کے مطابق جوابی کارروائی سے دہشت گرد فرار ہوگئے تاہم اس دوران فائرنگ کے تبادلے میں کوئیک رسپانس فورس کا ایک اہلکار مدثر حیات خان ہلاک ہوگیا۔

پولیس کے مطابق فائرنگ کے تبادلے میں گولیوں کی زد میں آکر کھیتوں میں کام کرنیوالے 2 مزدور بھی ہلاک ہوگئے جبکہ دیگر دو زخمی ہوگئے۔

مقامی افراد نے ڈیلی اردو کو بتایا کہ پولیس نے بے گناہ مزدوروں پر گولیاں چلائیں۔ جس سے دو مزدور موقع پر دم توڑ گئے اور دو شدید زخمی ہوگئے۔

مقامی افراد نے مزید بتایا کہ مزدور روانہ اپنے کھیتوں میں کام کرتے ہیں اور پولیس والے انہیں بخوبی واقف ہیں لیکن اس کے باوجود مزدوروں کو مارا گیا۔