کراچی سے لشکرِ جھنگوی کے 4 دہشت گرد گرفتار

کراچی (ڈیلی اردو ) صوبہ سندھ کے صوبائی حکومت کراچی میں کاؤنٹر ٹیررزم ڈیپارٹمنٹ ( سی ٹی ڈی) اور حساس ادارے نے مشترکہ طور پر آپریشن کرتے ہوئے کالعدم لشکر جھنگوی سے تعلق رکھنے والے 4 دہشت گردوں کو گرفتار کرلیا۔

تفصیلات کے مطابق سی ٹی ڈی اور وفاقی حساس ادارے نے کراچی کے علاقے سائٹ اے میں انفارمیشن بیسڈ آپریشن کیا، آپریشن کے دوران کالعدم لشکر جھنگوی سے تعلق رکھنے والے 4 دہشتگرد گرفتار کر لئے گئے۔

ترجمان سی ٹی ڈی نے بتایا کہ ملزمان نے اورنگی میں لشکر جھنگوی کا خفیہ سیل بنایا ہوا تھا جبکہ مگھو پیر اقبال مارکیٹ اور پاکستان بازار میں ٹارگٹ کلنگ کرتے تھے۔

ترجمان کا مزید کہنا تھا کہ گرفتار ملزمان میں امین عرف منا عرف منیرعرف چنگاری، شاہنواز عرف سلیم مکینک، معاذ خان اور یاسین بھی گرفتار ملزمان میں شامل ہیں۔

ملزمان نے اقبال مارکیٹ کے علاقے میں مولانا رحیم کو قتل کیا اور اقبال مارکیٹ کے علاقے میں ہی شمیم خان کی ریکی کرکے ٹارگٹ کلنگ کی۔

سی ٹی ڈی کے مطابق گرفتار ملزمان کالعدم لشکر جھنگوی کے نامی گرامی دہشت گرد ہیں، امین عرف منا 27 قتل کیسز میں 9 سال ، شاہنواز عرف سلیم متعدد قتل کیسز میں 18 ماہ سے زائد جیل کاٹ چکا ہے۔

ترجمان کا کہنا ہے کہ ملزمان سے 2 نائن ایم ایم اور 2 ٹی ٹی پسٹل اور موٹر سائیکل برآمد ہوئی، ملزمان نے مزید ٹارگٹ کلنگ بھی کرنی تھی تاہم تفتیش کا عمل جاری ہے۔