کراچی میں سی ٹی ڈی کی کارروائی، بھارتی خفیہ ایجنسی ”را” کا تربیت یافتہ ٹارگٹ کلر گرفتار

کراچی (ڈیلی اردو) کاؤنٹرٹیرارزم ڈیپارٹمنٹ سندھ نے کراچی میں بڑی کارروائی کرتے ہوئے بھارتی خفیہ ایجنسی ”را” کے تربیت یافتہ ٹارگٹ کلر کو گرفتار کرلیا۔

تفصیلات کے مطابق کراچی میں کاؤنٹرٹیرارزم ڈیپارٹمنٹ نے سولجر بازار میں بڑی کارروائی کرتے ہوئے بھارتی خفیہ ایجنسی را کے تربیت یافتہ ٹارگٹ کلر شمشاد خان کو گرفتار کرلیا۔

انچارج سی ٹی ڈی چوہدری صفدر نے بتایا کہ گرفتار ملزم ایم کیو ایم گلبہار ناظم آباد کا سابقہ سیکٹر انچارج ہے، گرفتار ملزم ٹارگٹ کلنگ کی 10سے زائد وارداتوں میں ملوث ہے۔

چوہدری صفدر کا کہنا تھا کہ ملزم 1992 میں کراچی آپریشن شروع ہوتے ہی بھارت فرار ہوگیا تھا اور مفروری کے دوران ایم کیو ایم قیادت نے ”را” سے رابطہ کرایا، بمبئی میں ”را” افسران نے شمشاد خان کو عسکری تربیت دی۔

انچارج سی ٹی ڈی نے کہا کہ بھارتی ایجنسی ”را” نے ملزم کو کراچی میں دہشتگردی کیلئے تیار کیا، ملزم کو کراچی پہنچ کر پولیس، خفیہ ایجنسی کے اہلکار اور مخالفین کو قتل کا ٹاسک دیا گیا اور کراچی میں افراتفری پھیلانے کی ہدایت دی۔

چوہدری صفدر نے بتایا کہ شمشاد خان نے کراچی واپس آ کر ٹارگٹ کلنگ کی، 1994 میں حقیقی کارکنان آصف کیپسن اور فہیم فہمی کو قتل کیا، 1995 میں حقیقی کارکنان انصار، کامران، رفیق پپو کو ٹارگٹ کیا اور 2013 میں ایم کیو ایم کارکن حامد کو قتل کیا۔

ان کا کہنا تھا کہ ملزم نے 2014 میں ایم کیو ایم کارکنان تراش اور حیدر حسین اور ایم کیو ایم یونائیٹڈ 4 ناظم آباد فراز کو قتل کرایا اور سرفراز باڈی بلڈر کو ٹارگٹ کیا، ملزم سزا یافتہ اور دو مرتبہ جیل بھی جا چکا ہے۔