کشمیر میں عسکریت پسندوں کا حملہ، ایک بھارتی پولیس افسر ہلاک، چار زخمی

سری نگر (ڈیلی اردو/بی بی سی) انڈیا کے زیرانتظام کشمیر کے شمالی ضلع بانڈی پورہ میں عسکریت پسندوں کے ایک گرنیڈ حملے میں ایک پولیس افسر زبیر احمف ہلاک جبکہ چار زخمی ہو گئے ہیں۔

حکام کے مطابق عسکریت پسندوں نے جمعے کی دوپہر پولیس اور سینٹرل ریزرو پولیس فورس کی مشترکہ پارٹی کو ضلع بانڈی پورہ میں نشاط پارک کے قریب نشانہ بنایا۔

پولیس کی جانب سے جاری کردہ بیان کے مطابق پولیس اور نیم فوجی دستوں کی مشترکہ گشتی پارٹی پر نامعلوم افراد نے گرینیڈ حملہ کیا جس میں ایک نیم فوجی اہلکار اور چار پولیس اہلکار زخمی ہوئے ہیں۔

Emotional Scenes from the house of SPO Zubair Ahmad who was killed in a millitant attack today in North Kashmir's Bandipora District.#Kashmir #Bandipora pic.twitter.com/ejfWCvkJv1

— Sajid Raina (@SajidRaina1) February 11, 2022

پولیس ترجمان نے اس واقعے کی تصدیق کرتے ہوئے بتایا کہ زخمیوں کو ہسپتال پہنچایا گیا جہاں ایک پولیس اہلکار زُبیر احمد زخموں کی تاب نہ لاتے ہوئے دم توڑ گیا۔

پولیس ترجمان نے ایک بیان میں بتایا کہ واقعے کے فوراً بعد وسیع علاقے کا محاصرہ کیا گیا اور اس سلسلے میں ’تحقیقات شروع کی گئی ہیں اور اس حملے کے تمام کوائف اور پس منظر کا پتا لگایا جائے گا۔‘

یاد رہے کہ کشمیر میں گزشتہ برس 179 عسکریت پسند، پولیس اور فورسز کے 43 اہلکار اور 35 عام شہری مسلح تشدد کے مختلف واقعات میں ہلاک ہوئے تھے۔

پولیس کے مطابق گذشتہ سال عسکریت پسندوں کے 646 اعانت کار گرفتار کیے گئے جبکہ 128 نوجوانوں نے عسکریت پسندوں کی صفوں میں شامل ہوئے۔