اسلام آباد خودکش حملہ: پاکستان نے بھارت اور افغانستان کو ملوث قرار دیا

اسلام آباد (ڈیلی اردو رپورٹ) پاکستان کی حکومت نے اسلام آباد میں امام بارگاہ خدیجۃ الکبریٰ پر جمعے کے روز ہونے والے خودکش دھماکے میں ملوث حملہ آور کی شناخت کر لی ہے اور متعدد وفاقی وزرا نے اس دھماکے کے لیے بھارت اور افغانستان کو ذمہ دار ٹھہرایا ہے۔

وفاقی دارالحکومت میں جمعے کی نماز کے دوران واقع امام بارگاہ میں ہونے والے دھماکے میں 35 افراد ہلاک اور 169 زخمی ہوئے۔ پاکستان کے سرکاری نشریاتی ادارے پی ٹی وی نیوز کے مطابق حکومتی ذرائع نے بتایا کہ خودکش حملہ آور نے افغانستان میں دہشت گردی کی تربیت حاصل کی اور متعدد بار افغانستان کا سفر کیا۔

حکومتی بیان میں کہا گیا ہے کہ ’’طالبان حکومت کی سرپرستی میں افغانستان میں موجود مختلف دہشت گرد گروہ پورے خطے کی سلامتی کے لیے خطرہ ہیں۔ پاکستان میں ہر دہشت گرد کارروائی کے پیچھے افغانستان اور بھارت کا گٹھ جوڑ ہوتا ہے۔‘‘

وزیر دفاع خواجہ آصف نے بھی بھارت اور افغانستان کے کردار کی نشاندہی کی اور ایکس پر کہا، ’’یہ ثابت ہو چکا ہے کہ حملے میں ملوث دہشت گرد افغانستان آتا جاتا رہا ہے۔ بھارت اور افغانستان کے درمیان ملی بھگت بے نقاب ہو رہی ہے۔‘‘

وزیر مملکت برائے داخلہ طلال چوہدری نے کہا کہ حملہ آور کی شناخت ہو چکی ہے، اگرچہ وہ افغان شہری نہیں تھا، لیکن وہ افغانستان کا سفر کرتا رہا۔ دیگر وفاقی وزرا نے بھی اسی طرح کے الزامات عائد کرتے ہوئے بھارت اور افغانستان کو دھماکے کے ذمہ دار قرار دیا۔

ادھر افغانستان میں طالبان حکومت کی وزارتِ خارجہ کی جانب سے جاری بیان میں اسلام آباد میں امام بارگاہ میں دھماکے کی مذمت کی گئی ہے۔

افغان وزارتِ خارجہ کے ترجمان عبدالقہار بلخی نے ایک پر ایک بیان میں کہا ہے کہ ’افغانستان میں طالبان حکومت اسلام آباد میں جمعہ کی نماز کے دوران امام بارگاہ میں ہونے والے خودکش حملے کی شدید مذمت کرتی ہے، جس کے نتیجے میں متعدد نمازی ہلاک اور زخمی ہوئے۔‘

انھوں نے ایکس پر اپنے بیان میں مزید کہا کہ ’افغانستان ایسے حملے مقدس عبادات اور مساجد کے تقدس کو پامال کرتے ہیں اور نمازیوں و بے گناہ شہریوں کو نشانہ بناتے ہیں۔‘