امریکہ ایران کو تباہ کرنے میں کامیاب نہیں ہوگا، خامنہ ای

تہران (ڈیلی اردو) ایران کے سپریم لیڈر آیت اللہ علی خامنہ ای نے منگل کے روز کہا کہ امریکی صدر ڈونلڈ ٹرمپ اسلامی جمہوریہ کو تباہ کرنے میں کامیاب نہیں ہوں گے۔

انہوں نے ایک خطاب میں کہا، ’’اپنی حالیہ تقاریر میں سے ایک میں امریکی صدر نے کہا کہ 47 برسوں سے امریکہ اسلامی جمہوریہ کو تباہ کرنے میں کامیاب نہیں ہو سکا... میں آپ سے کہتا ہوں: آپ بھی کامیاب نہیں ہوں گے۔‘‘

یہ بیان ایسے وقت میں سامنے آیا جب تہران اور واشنگٹن کے درمیان منگل کو جنیوا میں مذاکرات کا دوسرا دور شروع ہوا۔ پہلا دور فروری کے اوائل میں منعقد ہوا تھا، اس سے قبل گزشتہ سال ایران اور اسرائیل کے درمیان جنگ کے دوران مذاکرات منقطع ہو گئے تھے۔

اپنے خطاب کے دوران خامنہ ای نے خبردار کیا کہ خلیج میں تعینات امریکی جنگی جہاز کو ڈبویا بھی جا سکتا ہے۔ انہوں نے کہا،’’ہم مسلسل سنتے ہیں کہ انہوں نے (امریکہ نے) ایران کی طرف ایک جنگی جہاز بھیجا ہے۔ جنگی جہاز یقیناً ایک خطرناک ہتھیار ہے، لیکن اس سے بھی زیادہ خطرناک وہ ہتھیار ہے جو اسے ڈبو سکتا ہے۔‘‘

خامنہ ای نے امریکہ کے ساتھ مذاکرات کے نتائج کے بارے میں شکوک و شبہات کا اظہار بھی کیا۔