ایران میں مظاہروں کے دوران 32 ہزار افراد ہلاک، امریکی صدر ٹرمپ

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ ایران میں جنوری کے مظاہروں کے دوران قلیل عرصے میں 32 ہزار افراد مارے گئے تھے۔

وائٹ ہاؤس میں صحافیوں سے گفتگو کرتے ہوئے ان کا کہنا تھا کہ ایران کے ساتھ ایک بہتر معاہدے کی ضرورت ہے۔ ٹرمپ نے کہا کہ ایرانی عوام اپنے رہنماؤں سے مختلف ہیں اور یہ صورتحال انتہائی افسوسناک ہے۔

ٹرمپ نے یہ بھی کہا کہ ایرانی حکام 800 سے زائد افراد کو پھانسی دینے جا رہے تھے، جن میں سے 837 افراد کو کرین کے ذریعے پھانسی دی جانی تھی۔ ان کے بقول انہوں نے ایران کو پیغام دیا تھا کہ اگر ایک شخص کو بھی پھانسی دی گئی تو اسے فوری طور پر نشانہ بنایا جائے گا۔

دوسری جانب عباس عراقچی نے ٹرمپ کے دعوے پر ردعمل دیتے ہوئے ثبوت کا مطالبہ کیا ہے۔ انہوں نے اپنے بیان میں کہا کہ ایران کی حکومت نے حالیہ کارروائیوں کے تمام 3117 متاثرین کی جامع فہرست شائع کر دی ہے، جن میں تقریباً 200 سکیورٹی اہلکار شامل ہیں۔

عباس عراقچی کا کہنا تھا کہ اگر کسی کو ان اعداد و شمار کی درستگی پر شک ہے تو وہ ثبوت کے ساتھ بات کرے۔