ایران کی جامعات میں حکومت مخالف طلبہ مظاہرے، تہران میں جھڑپیں

تہران (ڈیلی اردو) ایران میں گذشتہ ماہ کے احتجاج اور کریک ڈاؤن کے بعد کئی جامعات کے طلبہ نے حکومت مخالف مظاہرے کیے ہیں۔

ہفتے کے روز دارالحکومت تہران میں واقع شریف یونیورسٹی آف ٹیکنالوجی کے کیمپس میں مظاہرین کو مارچ کرتے دیکھا گیا۔ بعد میں ان طلبہ اور حکومت کے حامیوں کے درمیان جھڑپیں بھی ہوئیں۔

تہران کی ایک اور جامعہ شہید بہشتی یونیورسٹی میں پُرامن دھرنا دیا گیا، جبکہ امیر کبیر یونیورسٹی آف ٹیکنالوجی میں بھی حکومت مخالف نعرے بازی کی اطلاعات ہیں۔

ایران کے دوسرے بڑے شہر مشہد میں بھی مقامی طلبہ نے ریلی نکالی اور ’آزادی‘ اور ’اپنے حقوق کے لیے آواز بلند کرو‘ جیسے نعرے لگائے۔

یہ طلبہ جنوری میں احتجاجی مظاہروں کے دوران ہلاک ہونے والوں کی یاد میں جمع ہوئے تھے۔ نئے سمسٹر کے آغاز پر سینکڑوں طلبہ نے کیمپس میں پُرامن مارچ کیا اور ’آمر مردہ باد‘ سمیت دیگر نعرے لگائے۔ ویڈیوز میں حکومت کے حامیوں کا ایک الگ ہجوم بھی دیکھا گیا، جس کے بعد دونوں گروہوں کے درمیان جھڑپیں ہوئیں۔

تاحال یہ واضح نہیں کہ ان مظاہروں کے دوران کسی کو گرفتار کیا گیا ہے یا نہیں۔

یاد رہے کہ امریکہ نے ایران کے قریب اپنی فوجی موجودگی میں اضافہ کیا ہے اور امریکی صدر ڈونلڈ ٹرمپ نے کہا ہے کہ وہ محدود فوجی حملے پر غور کر رہے ہیں۔