ایران کے سپریم لیڈر خامنہ ای کی اہلیہ سمیت 7 اعلیٰ کمانڈر ہلاک

تہران (ڈیلی اردو) ایران کے سرکاری ٹی وی چینل نے اعلان کیا ہے کہ ایران کے رہبرِ اعلیٰ آیت اللہ علی خامنہ ای کی اہلیہ منصورہ خجستہ باقرزادہ ہلاک ہو گئی ہیں۔

ایرانی میڈیا کے مطابق وہ اپنے گھر میں ہلاک ہوئیں۔ اس سے قبل ایرانی ذرائع نے اطلاع دی تھی کہ منصورہ کوما میں ہیں۔

خیال رہے کہ اسرائیلی اور امریکی حملوں میں رہبرِ اعلیٰ کی بیٹی، نواسی اور ایک داماد کی موت کی تصدیق پہلے ہی ہو چکی ہے۔

ایران کے رہبرِ اعلیٰ کا خاندان ان کی اہلیہ، چار بیٹے اور دو بیٹیوں پر مشتمل ہے۔

ایران کے سات اعلیٰ کمانڈروں کی ہلاکت کی تصدیق

ادھر ایران کی پاسدارانِ انقلاب سے منسلک تسنیم نیوز ایجنسی نے پہلی بار مسلح افواج کے سات کمانڈروں کی ہلاکت کی تصدیق کی ہے اور ایک فہرست بھی جاری کی ہے۔

اسرائیلی اور امریکی حملوں میں مارے جانے والے کمانڈروں بریگیڈیئر جنرل محمد شیرازی، دفترِ کمانڈر ان چیف کے سربراہ، بریگیڈیئر جنرل صالح اسدی، مسلح افواج کے جنرل سٹاف کے انٹیلیجنس کے نائب، میجر جنرل (ایئر فورس) پائلٹ محسن درہباغی، مسلح افواج کے لاجسٹکس اور سپورٹ کے نائب، بریگیڈیئر جنرل اکبر ابراہیم زادہ، دفترِ کمانڈر ان چیف کے نائب سربراہ، بریگیڈیئر جنرل غلام رضا رضائیان، فراجا (قانون نافذ کرنے والی کمانڈ) کے انٹیلیجنس آرگنائزیشن کے سربراہ، بریگیڈیئر جنرل بہرام حسینی مطلق، منصوبہ بندی اور آپریشنز ڈپارٹمنٹ کے سربراہ، مسلح افواج کے جنرل سٹاف کے آپریشنز کے نائب، بریگیڈیئر جنرل حسن علی تاجک، مسلح افواج کے جنرل سٹاف کے لاجسٹکس ڈپارٹمنٹ کے سربراہ شامل ہیں۔