بلوچستان میں 100 شدت پسند ہلاک، کچھی میں 200 سے زائد آپریشنز مکمل، سرفراز بگٹی

کوئٹہ (ڈیلی اردو) پاکستان کے شورش زدہ صوبہ بلوچستان کے وزیر اعلیٰ میر سرفراز بگٹی کی زیر صدارت انسداد دہشتگردی اجلاس میں بتایا گیا کہ صوبے کے شمالی علاقوں میں 100 شدت پسند ہلاک کیے جا چکے ہیں، جبکہ ضلع کچھی میں 200 سے زائد آپریشنز کامیابی سے مکمل ہو چکے ہیں۔

وزیر اعلیٰ سیکریٹریٹ میں منعقد اجلاس میں قومی اور صوبائی ایکشن کمیٹیوں کے اہداف، امن و امان کی صورتحال اور جاری سکیورٹی اقدامات کا تفصیلی جائزہ لیا گیا۔ ایڈیشنل چیف سیکریٹری داخلہ حمزہ شفقات نے اجلاس کو بریفنگ دیتے ہوئے بتایا کہ شدت پسندوں کے خلاف مربوط اور مؤثر کارروائیاں جاری ہیں اور دیگر اضلاع میں بھی جرائم پیشہ عناصر کے خلاف کامیاب آپریشنز ہو رہے ہیں۔

اجلاس میں یہ بھی بتایا گیا کہ صوبے میں 3561 غیر قانونی پیٹرول پمپس سیل کر دیے گئے، کسٹم حکام نے 2575 آپریشنز کیے اور 416 نان کسٹم پیڈ گاڑیاں ضبط کی گئی ہیں۔ علاوہ ازیں، مدارس کی رجسٹریشن اور ضوابط پر مکمل عمل درآمد یقینی بنایا جا رہا ہے۔

وزیر اعلیٰ میر سرفراز بگٹی نے متعلقہ اداروں کو ہدایت کی کہ کارروائیوں کی رفتار مزید تیز کی جائے اور کسی صورت نرمی نہ برتی جائے۔ انہوں نے واضح کیا کہ قومی اور صوبائی ایکشن کمیٹیوں کے فیصلوں پر تندہی اور ذمہ داری کے ساتھ عمل درآمد یقینی بنایا جائے گا۔