بلوچستان : سکیورٹی فورسز کے دو آپریشن، 17 دہشتگرد ہلاک، فائرنگ کے تبادلے میں ایک اہلکار بھی ہلاک

کوئٹہ(ڈیلی اردو) بلوچستان کے اضلاع کچھی اور خاران میں سکیورٹی فورسز نے انٹیلی جنس معلومات کی بنیاد پر دو الگ الگ کارروائیاں کرتے ہوئے مجموعی طور پر 17 دہشتگردوں کو ہلاک کردیا، جبکہ خاران میں فائرنگ کے تبادلے کے دوران پاک فوج کا ایک اہلکار بھی ہلاک ہوگیا۔

پاک فوج کے شعبہ تعلقات عامہ کے مطابق یہ کارروائیاں یکم نومبر کو کی گئیں۔ ضلع کچھی کے علاقے سنی میں دہشتگردوں کی موجودگی کی اطلاع پر سکیورٹی فورسز نے کارروائی کی۔ اس دوران دہشتگردوں کی جانب سے علاقے میں ناکہ بندی کی کوشش ناکام بنا دی گئی اور فائرنگ کے تبادلے میں 10 دہشتگرد ہلاک ہوگئے۔ کارروائی کے بعد ان کے قبضے سے اسلحہ اور گولہ بارود بھی برآمد کیا گیا۔

دوسری کارروائی ضلع خاران میں کی گئی، جہاں سکیورٹی فورسز نے دہشتگردوں کے ایک ٹھکانے کو نشانہ بنایا۔ شدید فائرنگ کے تبادلے کے نتیجے میں مزید 7 دہشتگرد مارے گئے، جبکہ ان کے قبضے سے اسلحہ اور گولہ بارود برآمد ہوا۔

آئی ایس پی آر کے مطابق خاران میں جھڑپ کے دوران پاک فوج کے 25 سالہ سپاہی حکمت اللہ بھی ہلاک ہوگئے، جن کا تعلق ضلع کرک سے تھا۔ انہوں نے کارروائی کے دوران دہشتگردوں کے خلاف لڑتے ہوئے جان گنوائی۔

ترجمان پاک فوج کا کہنا ہے کہ دونوں علاقوں میں ممکنہ طور پر موجود دیگر دہشتگردوں کا سراغ لگانے اور ان کے خاتمے کے لیے کلیئرنس آپریشن جاری ہیں۔ بیان میں ہلاک ہونے والے دہشتگردوں کو دو مختلف دہشتگرد گروہوں سے وابستہ قرار دیتے ہوئے ان کے پیچھے بھارتی حمایت کا الزام بھی عائد کیا گیا ہے۔

آئی ایس پی آر کے مطابق نیشنل ایکشن پلان کے تحت منظور شدہ حکمت عملی عزمِ استحکام کے تحت دہشتگردی کے خاتمے کے لیے سکیورٹی فورسز اور قانون نافذ کرنے والے اداروں کی کارروائیاں جاری رہیں گی۔