بھارتی حکومت نے نئی دہلی کار دھماکے کو دہشت گردانہ واقعہ قرار دے دیا

نئی دہلی (ر س ) بھارتی حکومت نے پیر کو دارالحکومت دہلی میں ہونے والے مہلک کار دھماکے کو باضابطہ طور پر ایک "دہشت گردانہ واقعہ" قرار دے دیا ہے۔ یہ فیصلہ وفاقی کابینہ نے ایک قرارداد منظور کر کے کیا۔ کابینہ کے بیان میں کہا گیا ہے کہ ملک نے قوم مخالف قوتوں کی طرف سے ایک "گھناؤنا دہشت گردانہ واقعہ" دیکھا ہے۔

دھماکہ 10 نومبر کی شام تقریباً چھ بج کر 50 منٹ پر ایک کار میں ہوا، جو میٹرو اسٹیشن کے باہر سگنل پر رکی تھی۔ اس کے نتیجے میں کم از کم 14 افراد ہلاک اور 20 سے زائد زخمی ہوئے۔

حکام نے تاریخی لال قلعہ کو اگلے تین دنوں کے لیے سیاحوں کے لیے بند کر دیا ہے، جبکہ دہلی، کرناٹک، پنجاب، ہریانہ، ہماچل پردیش اور جموں و کشمیر میں ہائی الرٹ جاری کیا گیا ہے۔

فرانزک ٹیمیں، دہلی پولیس اور این آئی اے کے اہلکار موقع پر شواہد جمع کر رہے ہیں اور تحقیقات جاری ہیں تاکہ یہ معلوم کیا جا سکے کہ دھماکہ خودکش حملہ تھا یا کسی حادثے کے دوران ہوا۔ وزیر داخلہ امت شاہ نے کہا ہے کہ واقعے کی تمام زاویوں سے جانچ کی جا رہی ہے۔

دھماکے سے ایک روز قبل جموں و کشمیر کی پولیس نے ہریانہ کے فرید آباد میں دو رہائشی عمارتوں سے تقریباً 350 کلو گرام دھماکہ خیز مواد برآمد کرنے کا دعویٰ کیا تھا اور متعدد افراد کو حراست میں لیا تھا۔ پولیس اب یہ بھی جانچ رہی ہے کہ آیا دونوں واقعات کا کوئی تعلق ہے یا نہیں۔

ادھر بھارتی میڈیا نے سکیورٹی ذرائع کے حوالے سے اطلاع دی ہے کہ دھماکے میں بعض کشمیری عسکریت پسند بھی ملوث ہو سکتے ہیں، تاہم حکام کی جانب سے ابھی تک کوئی حتمی بیان سامنے نہیں آیا۔