سعودی عرب میں کورونا وائرس سے افغان شہری جاں بحق، 767 افراد متاثر

ریاض (ڈیلی اردو) سعودی عرب کے شہر مدینہ منورہ میں کورونا وائرس کے باعث ایک شخص جاں بحق ہوگیا جس کے بعد یہ مملکت میں ہونے والی مہلک وائرس سے پہلی ہلاکت ہے۔

سعودی وزارت صحت نے ملک میں کورونا وائرس سے پہلی ہلاکت کی تصدیق کرتے ہوئے بتایا کہ مدینہ منورہ میں کورونا وائرس کا شکار 51 سال کا افغان شہری انتقال کرگیا ہے۔

An Afghan national died in Madinah, marking the first fatality in #SaudiArabia from #coronavirus outbreak. https://t.co/QXUEkkINuA

— Saudi Gazette (@Saudi_Gazette) March 24, 2020

ترجمان وزارت صحت کے مطابق سعودی عرب میں مزید 205 افراد میں کورونا وائرس کی تصدیق ہوئی ہے جس کے بعد ملک میں متاثرہ افراد کی مجموعی تعداد 767 ہوگئی ہے۔

دوسری جانب سعودی عرب میں کورونا وائرس کی روک تھام کے لیے ملک بھر میں 21 روز تک کرفیو نافذ کردیا ہے جس کے بعد سے تمام بڑے شہروں میں سناٹا چھا گیا ہے۔

سعودی وزرات داخلہ کے مطابق کرفیو کا دورانیہ شام 7 سے صبح 6 بجے تک ہوگا جس کی خلاف ورزی پر 10 ہزار ریال جرمانہ اور قید کی سزا بھی دی جائے گی۔

خیال رہے کہ گزشتہ دنوں سعودی حکومت نے کورونا وائرس کے روک تھام کے لیے حرمین شریفین (مسجد الحرام اور مسجد نبویﷺ) کے علاوہ تمام مساجد میں جمعہ اور پنجگانہ نمازوں پر پابندی عائد کردی تھی۔