لکی مروت میں کرکٹ گراؤنڈ پر ڈرون حملہ، چار نوجوان زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع لکی مروت کے علاقے شیری خیل میں 14 نومبر کو شام کے وقت کرکٹ گراؤنڈ کے قریب ڈرون حملہ ہوا، جس کے نتیجے میں چار نوجوان زخمی ہو گئے۔

مقامی افراد کے مطابق نوجوان کرکٹ میچ کھیلنے میں مصروف تھے کہ اچانک ڈرون طیارہ نمودار ہوا اور حملہ کر دیا۔

زخمیوں میں وحید اللہ ولد گل زمان، نوید ولد اعظم شاہ، اسد اللہ ولد رشید اللہ اور وحید اللہ ولد احمد شامل ہیں۔

ایس ایچ او شہباز خیل زاہد خان نے چار زخمیوں کی تصدیق کرتے ہوئے بتایا کہ ان کی حالت خطرے سے باہر ہے۔ پولیس حکام نے ابتدائی تحقیقات کا آغاز کر دیا ہے۔

پاکستان تحریکِ انصاف کا ردِ عمل

پاکستان تحریکِ انصاف نے خیبر پختونخوا میں جاری ڈرون حملوں کی شدید مذمت کی ہے۔ پارٹی کے مرکزی شعبہ اطلاعات کے مطابق لکی مروت کے علاقے شیری خیل کرکٹ گراؤنڈ پر ہونے والے اس حملے میں چار شہری زخمی ہوئے، اور تحریک انصاف نے زخمیوں کی جلد صحت یابی اور اہلِ خانہ سے ہمدردی کا اظہار کیا۔

پی ٹی آئی نے کہا کہ خیبر پختونخوا میں اس سے قبل بھی ایک درجن سے زائد ڈرون حملے ہو چکے ہیں، جن میں عام شہری بلا وجہ نشانہ بنے۔ پارٹی نے وفاقی حکومت کی خاموشی اور بے عملی کو شدید تنقید کا نشانہ بنایا اور مطالبہ کیا کہ حکومت فوری طور پر اس معاملے کی جامع وضاحت دے اور اس سلسلے کا فوری خاتمہ یقینی بنائے۔

پی ٹی آئی نے مزید کہا: “یہ اقدامات نہ امن لاتے ہیں، نہ ریاستی رٹ مضبوط کرتے ہیں، بلکہ عوامی اعتماد کو مجروح کرتے ہیں۔ 

تحریک انصاف خیبر پختونخوا کے عوام کے ساتھ کھڑی ہے اور ہر ایسی کارروائی کے خلاف آواز بلند کرتی رہے گی جو بیگناہ شہریوں کی جان و مال کو خطرے میں ڈالے۔”