ملک بھر میں آج شب برأت عقیدت و احترام سے منائی جائیگی

لاہور (ڈیلی اردو) رحمتوں اور برکتوں بھری رات شب برات آج ملک بھر میں عقیدت و احترام کے ساتھ منائی جائے گی، لوگ اپنے پیاروں کی قبروں پر جائیں گے اور ان کی مغفرت کی دعا کریں گے۔

آؤ اپنے رب کی طرف، مغفرت کی رات آگئی، اس رات اللہ کریم کی سخاوت بے حد و حساب ہوتی ہے۔

حدیث پاک میں آتا ہے اس رات اللہ پاک دنیا والوں کی طرف خاص توجہ فرماتے ہیں۔

اس رات زندگی اور موت کا حساب کتاب تیار کیا جاتا ہے، ملک بھر میں عوام نے عبادات کی تیاریاں کر لی ہیں، صبح کو روزہ رکھنا رب کریم کی خاص رحمت کا باعث ہے۔

اہل علم اس شب کو رزق، صحت، زندگی، موت اور خیر و شر کے فیصلوں کی رات بھی کہتے ہیں، اس لیے اہل ایمان اس رات مغفرت اور بخشش مانگتے ہیں اور اللہ تعالی سے رحمت اور فضل کی التجائیں بھی کرتے ہیں۔

شب برأت کی مناسبت سے نذر و نیاز کا بھی خصوصی اہتمام کیا جاتا ہے جب کہ اور بڑی تعداد میں لوگ قبرستانوں کا رُخ کر کے اپنے پیاروں کی قبروں پر پھول چڑھانے کے ساتھ ساتھ ان کی مغفرت کے لیے فاتحہ خوانی کرتے ہیں۔

اس رات ملک بھر کی مساجد میں خصوصی عبادات کا اہتمام کیا جاتا ہے لیکن امسال کورونا وائرس کے باعث پاکستان علماء کونسل نے عوام سے اپیل کی ہے کہ وہ شب برأت میں گھروں میں رہ کر عبادات کریں اور اللہ کے حضور اپنے گناہوں کی توبہ کریں۔

علمائے کرام کا کہنا ہے کہ شب برأت کی عبادت کا اپنا ہی لطف و سرور ہوتا ہے، آج کورونا وائرس کی وبا اور کرب کی موجودہ فضا میں اللہ سے رحم و کرم اور پناہ طلب کی جائے۔