وزیراعظم کا شیعہ جامع مسجد کا دورہ، عون عباس کیلئے ایک کروڑ اور تمغہ کا اعلان

اسلام آباد (ڈیلی اردو) پاکستان کے وزیراعظم شہباز شریف نے اسلام آباد کے علاقے ترلائی میں شیعہ جامع مسجد خدیجۃ الکبریٰ (امام بارگاہ) کا دورہ کیا، جہاں 6 فروری کو نمازِ جمعہ کے دوران خودکش دھماکے میں درجنوں نمازی ہلاک اور زخمی ہوئے تھے۔

یاد رہے کہ اس حملے میں کم از کم 36 افراد ہلاک جبکہ 168 زخمی ہوئے تھے۔

وزیراعظم آفس سے جاری بیان کے مطابق، وزیراعظم نے حملے میں ہلاک ہونے والے نوجوان عون عباس کی بہادری کو خراجِ تحسین پیش کرتے ہوئے ان کے اہلِ خانہ کے لیے ایک کروڑ روپے امداد اور 14 اگست کو سرکاری تمغہ دینے کا اعلان کیا ہے۔

عینی شاہدین کے مطابق عون عباس نے خودکش حملہ آور کو اُس وقت دبوچ لیا جب وہ ہال کے دروازے سے اندر داخل ہو رہا تھا، جس کے بعد حملہ آور نے خود کو دھماکے سے اڑا لیا۔ اس واقعے میں عون عباس بھی دیگر نمازیوں کے ہمراہ ہلاک ہو گئے تھے۔

بیان کے مطابق، حملے میں ہلاک ہونے والے دیگر افراد کے اہلِ خانہ کو پچاس، پچاس لاکھ روپے، شدید زخمیوں کو تیس لاکھ روپے جبکہ دیگر زخمیوں کو دس لاکھ روپے مالی امداد دی جائے گی۔

اس حملے کی ذمہ داری داعش خراسان نے قبول کی ہے۔