پاراچنار: گل سکینہ قتل کیس؛ فوج اور پولیس کی تحقیقات پر اہلخانہ کا مکمل اعتماد

پاراچنار (محمد صادق) قبائلی ضلع کرم کے سرحدی علاقے پیواڑ میں زیادتی کا نشانہ بننے کے بعد قتل ہونے والی پانچ سالہ گل سکینہ کے والد اور رشتہ داروں نے قتل کیس کے تحقیقاتی عمل پر اعتماد کا اظہار کیا ہے اور حکومت سے اصل قاتل کو جلد بے نقاب کرنے کا مطالبہ کیا ہے۔

پاراچنار میں پریس کانفرنس سے خطاب کرتے گذشتہ دنوں نامعلوم افراد کے ہاتھوں زیادتی کے بعد قتل ہونے والی پانچ سالہ گل سکینہ کے والد وارث علی اور دیگر رشتہ داروں نے کہا کہ بچی کا قتل درندگی ہے اور وہ درندگی کو بے نقاب کرنے کیلئے بے چین ہیں، ان کی خواہش اور واحد مطالبہ یہی ہے کہ واقعے میں ملوث عناصر کو جلد بے نقاب کیا جائے اور انہیں سر عام پھانسی دی جائے۔

بچی کے والد اور رشتہ داروں نے گل سکینہ قتل کیس میں تیرہ افراد کی گرفتاری اور تحقیقاتی عمل پر اطمینان کا اظہار کیا ہے پاک فوج، مقامی انتظامیہ، پولیس اور تمام سرکاری اداروں، سول سوسائٹی اور قبائلی عمائدین کا بھر پور تعاون پر شکریہ ادا کیا ہے اور اس امید کا اظہار کیا ہے کہ اصل قاتل جلد بے نقاب ہونگے اور اپنے انجام کو پہنچیں گے۔